إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
وصيت ع الشاي |
ورجعت ارتب باقى حاجاتى |
كتبى واجنداتى |
بقالي كتير ماكتبتش |
ولا حتى قريت |
قبلتني حاجات خلتني ضحكت |
وحاجات خلتني سرحت |
وبكيت |
فكرتنى باصحابى القدام |
الندوات |
الصنايع واللحام |
الكتَ من الدروس |
لعب الكوره اللى على فلوس |
مذكرة اخر شهرين |
وصلاة الفجر ف الامتحانات |
السيجاير الفلوريدا وباكو النعناع |
نبيلة بتاعة المطعم |
بير السلم |
والبوسة أم بريزة |
تريزه .... امينة مكتبة النادى |
البلوزة المفتوحة لتالت زرار |
والاستعارات |
حليم .... |
حبيبها |
وفاتت جنبنا |
اللى خانقنقى بيهم اخويا صلاح |
علشان هالة بنت خالتنا صباح |
فيكتوريا |
وقهوة محى |
الجمعية ف ازازتين البيرة |
خناقى ع القميص اللى ماتكواش |
ويا اختى المرحومة سميرة |
ومابين ضحك وعياط |
وحنين للماضى وزكريات |
بتهزنى |
لقيت شيطان الشعر بيوزنى |
وانا مستغرب اية القصة |
بصيت لقلمى وطالت بنا البصة |
هزتنى رغرغة الدموع ف عينية |
لكن فجأة اترزع الباب |
دخلت بنتى وف ايدها كتاب |
بابا ... |
ماما بتقولك ماتجننهاش |
لا هى فاضية لعربى ولاحساب |
ولعت سيجارة واتنهدت |
وضحكت |
بعد مازعقت عشان تأخير الشاى |
بصيت لقلمى اللى ابتسم لى وقال |
ياسيدى.... بناقص قصيدة |