إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
الكلام الزين يسد الدين |
ويفتح للطريق طريقين |
تعدى منين تروح على فين |
منين ما يعجبك عدى |
وخد من فرحنا وادى |
وماتقولشى هاترسى منين |
مادمت زين كلامك زين |
والكلام لو زين |
يخضر ارضنا السمره |
يسهرنا مع القمره |
ياخدنا لفوق بين السموات |
يعيشنا العمر نسمات |
ولو تهنا فى بحر كبير |
تلاقى من الشطوط شطين |
سفاين حبنا ع الموج |
تعدى فوج ومليون فوج |
راياتها البيضه تحميها |
كلامنا الزين يرسيها |
ونمشى بوش مش وشين |
كلامنا الزين كلام حلوين |
مسلسل من دهب موزون |
ماهو مدفون ولا مرهون |
كلام فى النور يلف يدور |
ويوصل للقلوب وحنون |
كلام عامى كلام حساس |
وحاسس بجميع الناس |
كلام ينشال مافوق الراس |
تعالى وافتح الكراس |
وخد قلمك بكل حماس |
وصور نخلتين ع النيل |
واكتب عن مصر مواويل |
وعنها ست حسن الليل |
تسهر عاشقين عينها |
تهادى حبها حنينها |
ترقص راكبين الخيل |
تسمعهم كلامها الزين |
كلام الشعر عاميه |
ولهجه جميله مصريه |
صعيديه وبدويه |
وريفيه وحضريه |
وقله جنب زهريه |
وقعده حلوه مرضيه |
تشيل الشاى اهى جايه |
فى ايدها البوص |
وايدها التانيه شايله غموس |
وبتاوتين كده سخنين |
وحتة جبن عرقين فجل |
ومد ايدك وكل لقمه |
وشد الحيل مع الهمه |
واشرب شايك الاخضر |
وشيل فاسك كده اتمخطر |
وامسح عرقك السكر |
وكله فداكى ياغاليه |
ياقمره فى السما عاليه |
يامصر ياجنة العاشقين |
كلامك زين ونيلك زين |
وشعرك زين |
بناتك كلهم حلوين ويملو العين |
شبابك كلهم قوه |
شباب واعى كده فتوه |
على حدود الوطن واقفين |
ومتحدين |
هلال وصليب حبيب وحبيب |
قصص بطولات ملانه امجاد |
قصص ليها المحبه تصيب |
وراى سديد كلامنا اكيد |
بيعزف للامل اناشيد |
تغنيها الطيور وتجيد |
فنون الطير مع المواعيد |
مواسم كل عام فى الغيط |
تطلعنا فى مواكب صيد |
نجمع قوتنا من طينا |
عاطينا الرب وناصرنا |
وحافظ لينا مقدارنا |
عشان راضين ووطنين |
ومش بس احنا مصريين |
ووطنيين ومتحدين ومتضامنين |
بس لا |
عشان الطالع الناصع |
فى غيط وفى مدرسه وجامع |
كنيسه وورشه ومصانع |
كلامنا حتى فى الشارع |
كلام موزون كلام بارع |
وخمسه فى عين |
عيون حاسدين |
اذا قلنا كلامنا الزين |
نقوله ليه ومش قايلين |
وعندك سيد العالمين |
نبينا الزين |
كلامه زين |
بننهج منه منهاجنا |
نشيله فوق على راسنا |
كتير نشتاق |
كتير وتشدنا الاشواق |
كتير نسعد اذا نحفظ احاديثه |
وسيرته العطره وحسيسه |
تحس انى احنا متضامنين |
وشاددنا كلامه الزين |
والكلام الزين الزين |
مع الحبيبين |
كلام فى الكيل بيوفى |
وعز البرد بيدفى |
وعز الحر بيلطف |
كلام مرهف |
وشهد وشهد متصفى |
كلام محبوب لحبيبته |
وحبيبها وحشها محبوبها |
وشوق البعد دوبها |
تحمل شوقها مكتوبها |
وتكتب م الكلام سطرين |
كده حلوين |
حبيب يسهر مع اشواقه |
يناجى الليل |
ويحكى كل اسراره |
لطير الطير |
وتنهيدااته واهاته |
ماليها مثيل |
يخضر كل نبضاته |
فى صجرا فؤاده همساته |
بكلمتين ماهم عاديين |
بتفمهم ... |
حبيبته الغاليه محبوبته |
بنظرة عين |
قاطعهم من حشا قلبه |
وفرع اصيل هوى حبه |
مايعرف فين وجاى منين |
لكن يسمع انه فرع الزين |
وصاحب صاحبه يديله |
حياته وحبه وحنينه |
يامنه فى عرضه وفى ماله |
وعمره وكل احواله |
صاحب مايخون |
اصيل مضمون |
بطول العمر ما اتغيير |
ولا اتردد ولا اتحير |
بيعشق صاحبه ويحبه |
ويدى دوم كده لربه |
يدوم الحب والاخلاص |
ومهما الدنيا نادتنا |
مانسمعهاش |
بتغرى الناس كل الناس |
جميع الناس |
لكن ع الدرب متواصلين |
كده صاحيين |
كده اخيين |
كلامنا لبعض دايما زين |
والكلام الزين |
من ام لطفلها صغير |
وهى تغنى وتدادى |
ترضعه صدرها تهادى |
تطبطب مره وتحادى |
ومره تغنى وتهنى |
كلامها بجد مش عادى |
كلام نادى |
كلام معجون بحنيه |
كلام طالع من صميم القلب |
كلام يتحب كله حنين |
كلام كده زين |
والكلام الزين |
يقوله الشيخ على المنبر |
بقران العزيز يؤمر |
يقول مكتوب ومتقدر |
وينهى كتير عن المنكر |
ايات الرب ويفسر |
وكل الناس اليه سامعين |
ومنصتين ومشدودين |
للكلام الزين |
واذا تسمع كلامنا الزين |
تقول ياعين |
عشان العين دى اغلى شىء |
وفيها الشوف |
وفيها ليل نهار الضى |
وفيها شط بحر ومى |
وفيها الخضره والفاكهه |
وفيها الحب والنظرات |
وفيها كل شىء مكشوف |
كده مزدان وكله حنان |
ولو قلنا كمان وكمان |
عيون خضره |
عيون سوده |
عيون عسلى |
عيون اشكال مع الوان |
عيون حلوين بشوق وحنين |
عيون الكحل زاينها |
يكل الزين مليانين |
كلامهم زين |
والكلام الزين |
يقوله استاذ كبير جامعه |
وزير دكتور |
كلام يفتح مدارك كل رواده |
لدرب النور |
كلام يبنى بنايات المنى ف شهور |
تدوم سنوات تخش عصور |
كلام ينشال وله عوزه |
وليه القاعه محجوزه |
ادب وفنون وكله علوم |
كلام مرسوم |
مش فى الشكل |
فى المضامين كلام كده زين |
والكلام الزين |
فى مجلس عرفنا البلدى |
اذا ولدك ضرب ولدى |
اذا حقك صبح حقى |
اذا الموازين كده اختلفت |
وزادت فرقه ما اتالفت |
تلاقى القعده تجمهم |
تصالحهم وتنصحهم |
وتمسح كل مواجعهم |
كلام عادل كلام فاصل |
كلام عاقلين |
وناس فاهمين |
كلامهم زين |
رزين ومتين |
والكلام الزين |
اليه احنا كتير عاوزين ومحتاجين |
نصلح كل احوالنا بكلامنا الزين |
نعالج كل اتراحنا بكلامنا الزين |
نقيم موالدنا افراحنا بكلامنا الزين |
نعدل مجرى حياتنا بكلامنا الزين |
نواكب كل حضارتنا بكلامنا الزين |
وزادنا وكل زوادنا كلامنا زين |
واللى يقول الزين الزين |
راجل زين |
فياكل اللى تسمعنى |
وياكل اللى تفهمنى |
وياكل اللى عجبك شعرى فى القعده |
وقلت ياعينى ويالليلى |
داشاعر زين |
كلامه زين |
ارجوك انت برضوا كون |
ياخالى ياعمى اتمنى |
يكون كل كلامك زين |
هانلغى كل خصوماتنا |
بكلامنا الزين |
نخضر كل مزارعنا |
بكلامنا الزين |
يدوم العز وافراحنا |
بكلامنا الزين |
والكلام الزين كلام حلوين |
كلام عاقلين |
كلام شعرا كلام حكما |
كلام عادلين |
الزين الزين الزين |
كلامه زين وزين وزين وزين |