تاريخ الاضافة
الأربعاء، 8 يناير 2014 07:46:41 م بواسطة عبدالعزيز الشاطري
0 363
يامحمد بن الذيب والله مظلوم
يا محمد بن الذيب والله مظلوم
حكم المؤبد قصّ فالشعر جيده
بين المحاكم والقضية على السوم
والحكم جاير والقضية قصيده
ان قلت وان ما قلت واضح ومفهوم
لاهل العقول العارفة والرشيده
فوق الربيع اليعربي هلت غيوم
والموت دون الحق ياطى وريده
والناس توّ الحين تصحي من النوم
كلٍ يبي ياخذ نصيبه وفيده
وانته تقول الحق والحق مرسوم
بين العقول الفاهمة والبليده
يوم انّ معيار الحقيقة على اللوم
والزور معياره شجاع ووليده
وقتٍ كفانا الله شره من القوم
اللي على احراره تقدّم عبيده
وين الدمقراطية اللي لكم دوم
نادوا لها والراي فكر وعقيده
لا واخسارة شعر بالمدح موسوم
لو مات شيخ القوم قالوا فقيده
بعض العرب بالشعر وصّلته نجوم
واليوم وقت العوز غايب بريده
الشعر ما يرفع مهابيل ورخوم
وْلا نزّل اللي شبْحهم للبعيده
يالذيب تبقى ذيب لو صرت محكوم
وابالحصين يدوج في خضر بيده
والحرّ ما هاب الغرانيق والبوم
في كل مرقابٍ يعشّيه صيده
لا شك تمسي بك وتصبح بك هموم
والحكم ماضي فيك ظلمه وكيده
محدٍ ورى القضبان مرتاح لو يوم
يا جعل قاض الظلم تنشلّ إيده
محدٍ يلومك وانت قرمٍ من قروم
للحق قلت ولاانْت هايب وعيده
كم من سجينٍ دونه شهود وختوم
بالظلم يوم العدل مقفول حيده
اليوم قول الحق والصدق مفطوم
والكذب والباطل لهم درّ ديده
والفكر بين الناس والعقل موهوم
والطيش صاحي والخفايف شديده
والوقت من بعض البشر صار منجوم
والشر فوق الخير في يوم عيده
لا بد ما يظهر لك الحق وتقوم
لو زاد همّك والليالي عنيده
اصبر وربك يفرج لكل مهموم
لو قيدوه الناس ينفك قيده
إسم الشاعرإسم الكاتبالبلدإسم القسمالمشاهدات
عبدالعزيز الشاطريعبدالعزيز الشاطريالسعودية☆ دواوين الأعضاء .. الشعر العامي363
لاتوجد تعليقات
جميع الحقوق محفوظة لبوابة الشعراء .. حمد الحجري ©