تاريخ الاضافة
الخميس، 9 يناير 2014 09:44:40 ص بواسطة عبدالعزيز الشاطري
0 236
ماكل شعبٍ يثور يغير القادة
ما كل شعبٍ يثور يغيّر القاده
ولا كل قادة تقيم شْعوبها ثوره
العدل والظلم ميزان الملا عاده
بالعدل ترقى الأمم والأرض معموره
والظلم له كل شعبٍ يفهق زْناده
ويثور وقت الغضب لو صار محظوره
بعض الدول شعبها ما يهتني زاده
ملّ وتضايق من الجدران وشهوره
والصبر ملّه تَشَاكي صحوه رْقاده
والنفس مع دورة الأيام منصوره
وبعض الدول أرضها لشعوبها وْساده
أمن ورخا والدروب ورود منثوره
والمملكة دايما بالعدل معتاده
باذن الولي في ظلال عيال اخو نوره
عبدالعزيز العريب الساس واولاده
شبه الجزيرة بعدهم صارت اسطوره
يالله من ثبّت البنيان واوتاده
في جنة الخلد عندك زيّن قصوره
واليوم ابو متعب وطوّر بها زياده
بالعلم والمعرفة يمحى الجهل نوره
عبدالله اللي تعلّى الطيب وارتاده
في كل مشراف يرقى يتعب صقوره
ما دامت امّة محمد عنه نشّاده
كل الأمور الصعاب تصير ميسوره
اللي يفك النشب لشعوب وقْياده
لا ناشها الظلم لازم تاخذ بشوره
قايد محنك حكيم ارْياه سدّاده
ما جانب الصحّ رايه بُعْد منظوره
وبعد الإصابة _ فديته _ غادر بْلاده
شهرين ونشوفها عامين مأسوره
كلٍّ سببها مرض والطبّ مافاده
ودْواه في شوفته فالدار وحضوره
والدار مع حزنها للأمر منقاده
من البحر للخليج وقامت الثوره
ثورة محبة وشعبه غاية مْراده
يرجع معافى سليم الجسم والصوره
والحمد لله تشافى وتمّ ما راده
وفي عودته كلّ واحد بيّن شعوره
كلٍّ فرح به وعدّه ثالث عْياده
والمملكة غرّدت بالحال مسروره
إسم الشاعرإسم الكاتبالبلدإسم القسمالمشاهدات
عبدالعزيز الشاطريعبدالعزيز الشاطريالسعودية☆ دواوين الأعضاء .. الشعر العامي236
لاتوجد تعليقات
جميع الحقوق محفوظة لبوابة الشعراء .. حمد الحجري ©