تاريخ الاضافة
السبت، 1 مارس 2014 07:27:19 م بواسطة هلال العتيبي
0 290
مشاريف حلم
من معين الغلا اللي ما تعكّر مزاجه
ومن هجوس تطاوعني على كل طرقا
ومن مشاريف حلمٍ شفّي ارقى دراجه
كل شي يحفزني وانا ليش م ارقى
جيت اسلّم وليل الشوق مشعل سراجه
م اعرف الياس فرقا منك يالياس فرقا
خطوة وخطوة ويقرب طريق المواجه
يصبح الشرق غرب ويمسي الغرب شرقا
هيه يامن سكن معلوق صدري وداجه
عان لك بصمة وتذكار في كل عرقا
هاك روض محد قبلك سلك في فجاجه
وانت عطني مناخ بدون رعدٍ وبرقا
وش لي بناويٍ رعده يزيد ارتجاجه
عاشق الشمس مايبغى السما غير زرقا
تدري ان الغلا شفّاف مثل الزجاجة
وان جرحك عن جروح المحبين فرقا
تجرح وتجحد وتحرم جريحك علاجه
وان نخيتك تداوي تلحق الكي حرقا
ماوهبتك غلا من شان ابي منك حاجة
ومااشتكيتك لو عيوني من الدمع غرقا
ماني اللي يضيّع صيدته في عجاجه
ويش عذري ًمن العتبان روق(ن) وبرقا
م اشرب الاّ قراح العد ما ارد هماجه
ولا التفت كلما ناحت على الغصن ورقا
يزعل الوقت يوم ويوم يضحك حجاجه
والليالي سراع وتسرق العمر سرقا
إسم الشاعرإسم الكاتبالبلدإسم القسمالمشاهدات
هلال العتيبيهلال العتيبيالسعودية☆ دواوين الأعضاء .. عامِّي290
لاتوجد تعليقات