تاريخ الاضافة
السبت، 14 مارس 2015 07:23:39 م بواسطة جمال نصير
0 285
لو تحسوا....
لو تحسوا بالدموع...
لو ف روحكم .. أو ضميركم..
دين .... بيسرى ف الضلوع..
لو صحيح كنتم عباد..
فيكوا قلب .. و فيكوا حس.. و فيكوا روح ..
منتوش جماد..
لو صحيح كان كل همكم .. البلاد
كنتوا حسيتوا بوجعنا..
وبهموم الرعب عايشة بين ضلوعنا..
وبدموع كالدم تغلى .. من ضياعنا..
*****
بعد ما ضيعتوا فينا ...كل شئ..
ال باقى بس لينا..
وال شايفينه بعنينا..
أب ميت بين ولاده..
طفل محروم من طفولته ف يوم ميلاده
ام مكلومه ...بتبكى..
مرة زوجها.. مرة روحها
مرة إبن من ولادها..
كان بيحلم بالعروسة..
جم كلاب الليل ... خدوه..
وف سجون الظلم راحوا.. توهوه..
أو ف بطن الارض .. أهله ..
كفنوه
بنت مسجونة .. وكلب من الحراسة ..
إغتصبها..
شوفنا أسوا شئ في مصر ..؟!
غير مصالح... نجستها
شوفنا حلم ..بس تايه ..ف الخباثة..
من وحوشها..
شوفنا ياما.. ولسه هنشوف..
من سوادها
*****
هى دى مصر ال تايهه ف القداسة..
وال غرقانه ف دينها..
وف شرفها..
م النجاسة..
وال ضاع الحق فيها .. بالخساسة
فين مروءة شعب ..كان..
بين قلوب الخلق دنيا من أمان..
وال كانت .....وال شالت..
وال حاربت .. وال صانت..
كل دا ..دا كان ... زمأأأأأأن..
*****
لما أب يموت - ككلب - بين ولاده..
دمه ماهوش راح يجف..
دمه راح يفضل مولع....وف عروقكم راح يلف
راح ينبت بين ضلوعكم
سهم يقطع بيه جدوركم
لما كلب يموت ...بننبح.. ليل نهار
واما إنسان روح ودم يموت ..بنعلنها ..انتصار..
هى حرب .. بس ماهش اى حرب..
حرب ضد الادمية..
ضد دين الرحمة .. دين الانسانية..
*****
يا رفاقى في الجروح..
دمنا .. دم الغلابة ...المجروحين..
للحق راح..
دمنا .. مش من تراب..
دمنا .. غالى وتمنه..
مصر ترجع... م الكلاب
موت أبونا مش عذاب..
تحبسونا..
وبفلوسنا وبحقوقنا .. ترعبونا..
تقلعوا النبت المخضر – رغم عنكم-
تبقوا للشيطان ... صحاب
مش هيفرق شئ معانا..
إحنا بيحركنا دينا... مش هوانا..
أما مصر ..فمصر لينا..
وف ترابها ..
وف سماها..
وف بحارها .. وف جبالها..
وف زروعها.. وف هواها
شئ إلاهى .. بينادينا...
كتبت فى موت سيد شعراوى
مارس 2015
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي285
لاتوجد تعليقات