تاريخ الاضافة
الأربعاء، 15 أبريل 2015 06:39:18 م بواسطة جمال نصير
0 238
مصر .. مين؟؟؟
مصر دولة... بمعنى دولة...؟؟
فيها شعب ...وتحت ايده .. تلقى حاكم...
فيها رؤية لشعب حالم ..
فيها عدل...
وفيها شورى.. وفيها حق على الجميع..
والحق صارم....؟؟
وللا مصر يا دوب كتيبة..
أو سرية من العساكر...
ليها باش شاويش... مخضرم...
بس ظالم.....؟؟؟
*****
تانى أشرح..........
دولة يعنى ... شعب يحكم..
والرئيس... دا يبقى عامل
يعنى عند الشعب ... يخدم..
والكتيبة.....
أن عسكر .. يحكموك...
يبقى واخد أمر ميرى... من قيادته
وانت عبد... يسخروك..
هو يؤمر...
وانت بس عليك تنفذ... أى أمر..
لو تفكر... وللا تحلم ... يعدموك...
*****
وصلت المعلومة ولا...برضه لسه..؟!
دولة يعنى .. تبقى حر..
تعمل ال تشوفه صح ..
بس عن حدود حدودك..
واما توصل عند غيرك ... لا تضر..
وال يحكم .. يبقى عبدك ...
يبقى ضلك .. عند رجلك...
والكتيبة ... دى أوامر ... عسكرية ..
حضرة الاومباشى فيها ...
خد أوامر أمريكية...
او أوامر صهيونية..
المهم ..
دى أوامر شيطانية .. ضد شعبه..
ضد بلده..
كل دوره يا دوب ... ينفذ...
والحكاية ... دى مصالحه...
هو كرسى .. وانت ضهره..
إنت رِجل تشيل ... سعادته...
*****
مصر مين..؟!
ال فاهم أى حاجة .. أى حاجة..
ما يداريش...
هى عيشة وموته واحدة..
لجل بلدى ف يوم تعيش ..
مصر دولة ... ولا بس يا دوب عساكر..
عند حبة ناس ... "عصابة"
ما تختشيش...
*****
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي238
لاتوجد تعليقات