تاريخ الاضافة
السبت، 9 مايو 2015 11:16:15 ص بواسطة جمال نصير
0 168
المحكمة.....
ورفعت ايدى للسما... ف المحكمة..
يارب .. عندى مظلمة...
يكفينى إنك ربنا...
وبحالى عالم .. وبظروفى المظلمة..
*****
والمحكمة..
على وسعها ... يا دوب باشوفها ..
ف حجم شبر...مزنّقة..
كل الخصوم متجمعة....
ف الغابة – أقصد ف الحياة – متكركبة ..
معرفش من جنس الابالسة ..
ولا دول.. من جنس أدم .. زينا..
وقضيتى... مين فيها يحكم والجناة..
على قتل حلمى... مصممة
*****
حتى القضاة فيها جناة...
والقاضى فاسد ... والجناية .. ملفقة
وماليش محامى .. والقضية... مدبرة..
ودفاعى بس .. هو أنا ..
لا شهود ولا أملك من الدنيا التعيسة ..
دليل براءة ... أو شفاعة ... مقنعة..
ملقتش في الدنيا الحزينة ... بشر يغيثنى..
أو دفاع .. أو حتى ... كلمة .. حنينة..
*****
حكمت عليا دنيتى .. أحكام وكانت ... مؤلمة
وحياتنا يا رب العباد .. بالظلم ضلمة .. معتمة..
والحكم كان ... يا الموت ..
يا إما ....
العيشة ميت .. والجريمة.. مُحْكمة..
*****
ف بلادى إما أعيش ذليل...
رجلى على درب الخنوع... متعودة
كاتم ف نفسى الخوف .. وعينى..
تحت رجلى... مخجله..
ممنوع لصوتى ..أرفعه..
وأنيني ما يعلمش بيه... غير ربنا..
*****
فرفعت أمري ... للسما..
يا رب هستأنف لحكمى بين عدالتك..
بين عدالة .. ملزمة..
فيها الميزان موزون ...أوامرة..
للخلايق ... صارمة..
فالعدل عدلك.. وانت رب الكون ..
وإحنا .. بناديك..
والجنة والنار بين إديك ...
فانظر بفضلك يا إلهى.. قضيتى..
فقضيتى ... مستعجلة..
*****
يارب انت خلقتنى...
وضمنت حقى في الحياة..
وكرامتى إنت حفظتها ... متأمنة..
وضمنت إنى أعبدك..
حق العبادة ... الأمنة..
فين الحياة ....ال انت بالقدرة يا رب ... خلقتها ....
من أجلنا...؟!
حبة عصابة .. مننا..
إتحكموا ... في قهرها...بل قهرنا...
ال سرق فينا الفلوس...
وال طمس فينا النفوس..
وال سرق فينا الامل ...
وال سرق ورد الحياة من غير ما حتى يكتمل
وال سرق الدمعة من بين الجفون
وال سرق ... حتى الظنون...
وباقيلنا أيه غير رحمتك..
وكلام نقوله ف سرنا ...
لما نكون وياك يا رب .. لوحدنا...
بين قبضتك
يبقالنا ايه من الحياة..
الا الحياة ... من غلبنا...
*****
على اى حال
يكفينا يا رب الخلايق اننا..
وياك وبين ايدك نحس بنفسنا...
ونقول عشانك انت بس...
نعيش ونحمد ربنا
ونكمل المشوار ونوصل .. دربنا..
*****
جمال نصير
ابريل 2015
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي168
لاتوجد تعليقات