تاريخ الاضافة
السبت، 6 يونيو 2015 06:47:07 م بواسطة جمال نصير
0 185
إبليس ..
إبليس صحيح..
لكن جريئ ..
أراجوز وعارف سرها...
ولعبها صح.. ف وقتها...
ورسم في ذهنه إزاى يحاصر قلبها..
الشعب كل همومه أيه........؟؟
الطبلة .. والفن الرخيص..
واللقمة.. حتى ولو تكون ..
مغموسة ذل في طعمها...
كل المهم .. البطن تشبع والعيال..
ترتاح.....تنام .. من غلبها..
*****
شيطان جريئ..
جند جنوده كلها..
ولعب على الوتر الحزين ..
اياكش تحرق كلها فوق شعبها...
الفن ...والطُبال ... كتير..
أكتر كتير من نملها...
واللقمة منحة ... تترمى للشقيانين ..
والشعب غصبن عنه راضى ... بأكلها..
يبقى كده ... الشيطان هيملك ... حبلها..
ويجرّها .. من غير كلام ... للمصيدة
وهناك ... هبقبض سعرها....!
*****
وكأنى شايفه ...
وهو حاطط رجل فوق رجل .. و بيشفط دمها..
بيبص بعيون مليانين .. كبر وترف
على شعب ملهوش في الحياة ..
إلا القرف..
يقتل ويحرق وال يفتح بقه لازم ..
يتخطف..
أو ينكونى على جرح من همه .. نزف
وشويتين..يشفط نفس..
ويخرجه في وشّنا.. وإحنا نزغرط م الفرح...
ونقول كممممممممان يا معلمه...
انت الوحيد ..
خلصتنا.. من حد جى يشدنا..
من جهلنا...
م ناس تقول قال الرسول..
عايزنا نرجع من جديد.. قال أيه...
الله يقول .. قرأن يقول...!!
قال أيه عايزنا نكون بشر...!!
ونعيش كشعب ... محترم.....!!
*****
إبليس رجيم...
فرعون بكامل ...سحنته
وفرض علينا الحلم حتى ..كدبته
ليلة ما نام .. في الحر عرى .. قعدته..!!
وصبح من الحلم المهبب أيه .. زعيم..
ورسم على الشعب الزعامة ..
والشهامة .. بدهيته...
*****
إبليس وفارض لعبته
ويمد رجل وفوقها رجل وفوق دماغنا.. جزمته..
ونصبها سيرك ولم فيه..
كل الكلاب الضالة تحرس .. قعدته..
ومفيش بشر...
عايز بشر...؟؟
ما بين سجين..أو بين شهيد ..أو بين طريد..
أو بين ضعيف وما لهش إلا.. لقمته
*****
جمال نصير مايو 2015
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي185
لاتوجد تعليقات