تاريخ الاضافة
الجمعة، 18 سبتمبر 2015 12:32:42 ص بواسطة حمد الحجري
0 375
غنيت ما قصدي طرب
غنيت ما قصدي طرب في حياتي
لاشك في دورات الأيام غنيت
وجاوب ورق الراعبي عن سكاتي
غنا وانا غنيت مثله وونيت
نشدتني عن حالتي يا شفاتي
وأنا مريض القلب لو أني اخفيت
اضحك وونات الحشا موجعاتي
واشرب قراح وكن شربي من الزيت
وبالعين يا خالد نشوف الجناتي
يا عز راسي شفت الاجرام واغضيت
واغيب كني محرمن بالصلاتي
لو هو ندهني رافع الصوت ما اوحيت
محدن يعرف جروحي الخافياتي
واليا نشدني واحدن عنه صديت
اصد وابغض ناقلين الوشاتي
واناجي اللي ما لغيره ترجيت
ما اظن به حي يسوي سواتي
وحيد بالدنيا وأصارع عفاريت
واذكر دروب ايامنا الماضياتي
والحقت مع عبرات صدري تناهيت
ياكثر ما شفنا من العايباتي
واليا زعلت من الخطا قالوا اخطيت
وطاحت عن الكتفين مجة عباتي
وحلقت بالأفكار ثم استجليت
وفكرت في شىء جرا لي وفاتي
حيفٍ يفتت بسرة القلب تفتيت
من جور هوله زلزل الراسياتي
يميت حي وباللحد يزعل الميت
ويشيب طفل ويذهل المرضعاتي
ينسن رضيع الديد صرعا مباهيت
وانا برجوى مجري الكايناتي
وكبرت باسماه العزيزه ولبيت
اللي عصم يوسف عن الخايناتي
ورده على يعقوب عقب التفاخيت
كلن يقول انه بفعله زناتي
والفعل راحوبه هل المجد والصيت
ما ريد دار الذل دار العصاتي
دار الخنا والغدر منها استخليت
متى عليها نسمع النايحاتي
ودار الثنا والجود فيها زغاريت
يـالله يللي تعلم الخافياتي
انك تمسيها على ما تمنيت