تاريخ الاضافةتاريخ التعديل
الأربعاء، 18 نوفمبر 2015 10:48:25 م بواسطة جمال نصيرالأربعاء، 18 نوفمبر 2015 11:00:11 م
0 213
الحمل
خمسين سنة.. تاهت ف عينى كأنها ..
خدعة سراب..
ما أنا كنت تايه زيكم..
عايش حياتى كأنها ..
من غير حساب
لما كبرت وراسى مالت .. شيبت..
حسيت يا دوب العمر كان...
سنوات عقاب..
*****
خمسين سنة...
مش حسبة برضه هيـّنه
حتى الأخصّ... ف عصرنا..
عصر الهباب..
اليوم يمر كأنه أطول م الحياة..
مشوار طويل ... مليان حفر
تقدر تقول ...
رحلة عذاب..
*****
على أى حال ..
موضوعنا ماهوش ف السنين.... ولا مُرها..
أيام وبتعدى وخلاص..
بتعدنا ... ونعدها..
موضوعنا بعد العمر دا..
وسنين حياتى ال إتحنت
واتغربت... واتشقلبت..
واتمزقت واتبهدلت...
ولقيتنى عايش وسط عزبة مضلمه
ما كانتش مصر ال إتولدت ف أرضها..
ما كانتش دوله لوحدها..
كانت يا دوب عزبة صغيرة ف إيد (حَمَل )...
*****
كان (الحَمَل...) مرسوم لنا ف صورة (أسد...)
لو حد قرب جنب منه ... يخطفه ..!!
أو ع الاقل .. فشعر ريشه ... ينتفه...!!
وفضلنا ننفخ ف الحَمَل..(قصدى الأسد)..!!
وبنينا له جوّا القلوب... غابات كتير..
يمكن يحن بحالنا .. يمكن ينكسف...
*****
بس الأسد.. (قصدى الحَمَل) !!
من جهله صدق كدبنا..
شفناه أسد .. فعمل أسد
من ضعفنا .. شفناه كبير
رغم انه جاهل والزمن...
كتب الشهادة ف صفحته
(إنسان حقير ...)
فرعن ..وعايز ...يتعبد ..
بس ال يكبر بالضلال...
لازم يجيه يوم ...يتجلد
لما إفترى... بان وإنكشف...
*****
لما خلصنا من الأسد ..
(قصدى الحَمَل)
طيب ومين صاحب الحَمَل ..
(قصدى الأسد)..؟؟
ما هو كل حيوان تلجمه...
ليه برضه صاحب يحكمه..
وكات الحقيقة المرعبة...!!
إن الحَمَل ....له ناس كتييييييييييييييير ...
(أقصد دول)..
عماله تعلف ..( قصدى تحكم ) .. فيه وهو م الهبل...
موهوم بإنه إله كبير...
جاله الخبل...!!
*****
وبقدرة الله الصمد
قامت زلازل ف البلد ..
(قصدى الدول)
والعالى طاح وسط التراب..
والواطى طاح .. بين الخراب
عمال يبص من الهدد
زى الفيران ... من غير عدد..
وساعتها بس عرفنا مين هى ( الدول...)
*****
ابريل 2012
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي213