تاريخ الاضافةتاريخ التعديل
السبت، 28 نوفمبر 2015 08:59:12 م بواسطة جمال نصيرالسبت، 28 نوفمبر 2015 11:39:34 م
0 152
بتخيلك
بتخيلك
جالسين على الترعة وحاضن بين رموشك حلمنا....
إيدى ف إيدك والهوا بيلف بينا..وبين إيديه بيضمنا
وأحط ايدى فوق ايديك وعينى باصة على الشجر..
بيشدنا..
عصفورة دايبة ف حب عصفورها الامير..
بتنام على ريشة بشقاوة ومن بعيد..
تغمز لنا...
*****
مديت ايديا لطرحة بيضة وتحتها.. بستان فرح..
والشوك مزين طرحتك..
لو قرّب القلب المتيم... ينجرح
كل ال باين رمش عين ...
فيه الامل ...ظلل ..طرح..
بس إل أكتر شدنى.....!!... عنقود عنب..!!
وفضلت أقطف من الورود..ال على خدك سرح..
والخوخ عصرته بين إيديا ولونة لحمر بللنى..
والفكرة جاتنى...
نقشت فوق خدك وبيه ..تلت العلم...
*****
ورميت بفستان الفرح ...فوق السواقي المتعبة..
وحكينا حدوته الحياة...
وبهية كات الملهمة..
وسمعنا صوت الشقيانين...
وبيغزلوا.... توبنا الجميل..ع المصطبة
وبيزرعوا م القمح فدان الامانى الممكنة..
بصيت لقيت كل السواقى .. بصوت غناهم ... كبرت
من نشوتى....
مديت إيديا..قطفت كل الياسمين..
ونقشت بيه... تلت العلم..
*****
وسرحتى بين حب المطر...
زي الألئ ترتطم...فوق الشجر...
والفرع لخضر ..يترعش..
تحت القمر...
حسيت ب خوفك.... غربتك
فعملت من صدرى ..وسادة .. وضمتك...
ورميت ب قلبك.. فوق كتافى.. وقلت هرتاح حبتين..
ويادوب هقوم....
يكمل طريقي ف سكتك..
وأكمل التلت ال باقى فى العلم...
*****
تلتين علم.....!!
كان تلت أحمر ..تلت أبيض..وال باقي ...
تلت أيه...؟؟ ما تسأليش...
هل هو لون حزن السنين....؟؟
هل هو لون خيبة الامل ... ف عيون ولاد الفلاحين..؟؟
هل هو كان كحل الهموم..في عيون بنات المحرومين ...؟؟
على أى حال......
كونت رغم الخوف ...علم....
ورفعت ف خدودك ....هرم...
وبروحى حييت العلم...ال اترسم... فوق الجبين..
وسط الولاد المطرودين..
*****
النوم غلبنى..
ف رحت جنبك واترميت..
وصحيت علي صوت الخراب..
نازل على قلبي وانا مابين اديك بتربطينى بالعذاب
وبتمسحى..لى دمعتى...
حسيت بشئ بيمزقك...
قلبك معايا وباقي جسمك.... يكرهك..
وصرخت فيك .. ما تفهمى..
قلتيلى وأفهم ليه..وحزنك...هو حزنى ورغم دا...
هو منايا وفرحتى....!!!
نوفمبر 28\2015
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي152