تاريخ الاضافةتاريخ التعديل
الأحد، 10 يوليه 2016 03:28:52 ص بواسطة جمال نصيرالأحد، 10 يوليه 2016 04:54:46 م
0 168
الحقيقة فين يا أمي...
أه يا أمى..
ريحيني .. و تقوليلى ..مين غلط..
وبصراحة إبنك تعب...
مين غلط ..
الحياة حوالينا ..وللا .....إحنا الغلط...؟!
*****
علمونا ف المدارس كل شئ...
بس كل شيئ يا أمى كان غلط..
يبقي كان العيب فى مين....؟!
هل يكون العيب ف إبنك..؟!
وللا كان العيب فى جهله.. علمونا بالغلط ...؟!
وللا كان العيب ف علم..ألفوه حبة لبط..؟!
والتاريخ ....مدهون بمكر ...
وكل مافيه كان يفط...؟!
يحكى قصة ناس.... عبط...؟!
*****
علمونا الدين يا أمى ... بالخطب..
والاخوة ..
زى أعواد الحطب....
والوطن حبة شعارات مستباحة بس يا دوب... تنكتب
والبلد ...حبة بقر...
كل دورها تتحلب...
والغلابة تعيش ذليلة...حتى لو كان فى الترب...
*****
فاكرة يا اما...
لما كنتى إنت وأبويا...تضربونا.. لما نغلط ف الكبير...
لما نقسى ع الصغير...
لما نهرب من المواجهة...
لما نتعب م المرض...
لما كنا نخاف من اولاد الشوارع...والحوارى..
رغم كان الخوف....عرض...
لما كنا نبات نعيط لو حرمتونا ....الدلع..
ياما كنتى تقولى يا اما إن خوفك م الدلع..
عمره مايصنع رجولة..
عمره ما يخلق جدع...
والنهارده......أه يا أمى م الوجع..
مين يقدّر للكبير...؟؟
مين بيعطف ع الصغير؟؟
مين يا أمى مش مطاطى – رغم عنه – للحقير..؟!
كلنا بنخاف يا أمى....
وكل ما فينا .. ضرير...
كلنا من غير ضمير...
*****
أه يا أمى... لسه فاكر إننا ف عصر الرجولة...
والشهامة...
واننا نقدر نعيش..من غير دلع...؟!
والدلع جوانا جذر....وانزرع...
والتفاهة..
والسفاهة..
والخلاعة والوضاعة...وشم ف قفانا إنطبع...
*****
أه يا أمى ...الكلام ف صدر إبنك .. إنحبس...
خايف أنطق أى حاجة ..ف أى حاجة ..
راح يقولوا إن إبنك...
إما خرّف...
أو تطرّف..
أو شيطان ملعون ومسّه ...إتلبس...
كلنا يا أمى بق ..بق واحد إتخرس..
*****
فاكره يا اما...
لما كنتى تعضى فيا ليل نهار ....
بس كات العضة منك... زى نغزة....لجل أضحك...
رغم حزنك..
كنتى بتخلينى أفضفض...
كنت أشدك....غصب عنك..
كنت أخبى دموعى منك..
لجل ماتقولى عن ابنك..
ابنى من خوفه ..انتفض..
لما ييجى الليل أجيلك.. تحت رجلك
كنت باشكى همومى صدرك..
وسط حضنك...
والنهارده .... راح أقولك... بس إوعى حد يعرف..
دا فى سرك..
أصل لو عرفوا ان بانطق...
يربطوا لسانى بقبرك...
*****
علمونا إن نسكت.. إن نخرص...
وال ينطق......أه يا ويله...
أى تهمة ويسجنوه..
أى موته ويقتلوه...
المهم ...إنه وسط الظلم...
يغرق..
دول كلاب سعرانة تاكل ف الحديد...
عضة منهم.....زى سم ف الوريد...
*****
يبقى فين الصح يا اما ..والغلط...؟!
علمينى من جديد ...معنى العبط....؟!
كل حاجة فى البلد دى...
كل واحد......
كله ماشي بالعبط.....
ولما ترفض...بس ترفض...
تترفض....أو تنقبض....
*****
جمال نصير فى 10 يوليو 2016
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي168
الأحد، 10 يوليه 2016 04:56:57 م
حمد الحجري
حين تتم كتابة العامية المصرية بهذه الطريقة الرائعة فانها بحق تنافس أجمل الشعر النبطي .