تاريخ الاضافة
السبت، 18 مارس 2017 02:01:19 ص بواسطة حمد الحجري
1 299
ياللْه يا كافي الأمور الشدايد
ياللْه يا كافي الأمور الشدايد
يا غافرٍ زلاّت نفسي وْخطاها
تغفر خطايانا نهار الوعايد
نهار جمع الناس في ملتقاها
أنته رفيع الأمر والأمر عايد
لك يامغزّر سحبها من سماها
تغفر ذنوبي يا رفيع العوايد
وكل زلّةٍ عنّى ثقيلة مْحاها
يا طارش منّي على شدْ قايد
قودا جماليّة يماني سداها
لي درهمت بين الرّمل والقعايد
تشبه على ربدا مظلّة ضناها
وان قابلت بك في الخلا والبعايد
كذيبةٍ جاعت تخبْ لْعشاها
جوّد عليها واقصد الشيخ زايد
ان كنت باتبلّغ وصاتي نباها
سلّم عليه وخبّره بالوكايد
وخصّه بناجي هرجتي من قصاها
-قلْ له أنا مْشفٍّ له وبي شوق زايد
ان كان زوّار الجماعة يباها
وان عاد لي عمرٍ طويل وْمدايد
بيشوفنا بالحثّ داره حذاها
بنزور مسحابٍ لنا في العوايد
بنحور هجنٍ مقبلات جداها
عوج العراقيب السّماح القوايد
كم بلّغنّا دار وأرضٍ نباها
ودّي عليهن واقصد شْيخ زايد
ونخبّره باقوالنا ولي قفاها
زايد إذا قالوا على الناس زايد
مشراق شمسٍ ما تغبّى ضحاها
زايد إذا قالوا على الناس زايد
نوّر قمرها في الظلام وْدجاها
وزايد إذا قالوا على الناس زايد
عدٍّ رهيِّ الما إذا قلّ ماها
وزايد إذا قالوا على الناس زايد
ان أقبلت روس الظوامي سقاها
وزايد إذا قالوا على الناس زايد
له سبلةٍ ما قد خلت من مْلاها
وزايد إذا قالوا على الناس زايد
له مهرةٍ يوم الملاقى حماها
وزايد إذا قالوا على الناس زايد
له حربةٍ دمّ المعادي دماها
وزايد إذا قالوا على الناس زايد
شيفة حصونه كل غريبٍ نصاه
وزايد إذا قالوا على الناس زايد
جيّد ولا كثر الخساير يراها
وزايد إذا قالوا على الناس زايد
له هرجةٍ وان جتْ عديّة تباها
خلاّ مطانيف الهجن والرّغايد
مسموحة مْن القيد تتلى هواها
يا شيخ يا راعي السّدود البعايد
أنته طبيب العين عندك دواها
والربْ ساعف لك وْترفى السدايد
بْمدّة يمينك جملةٍ من عطاها
وان كان ما يمحنْ ولا هوب كايد
ودّي برومية إنجليزي دواها
محطْ الاصابيع الثّلاث العدايد
هطفى الزناد وطيحته من غواها
من عند سلطانٍ يعرف العوايد
مندوبةٍ صوبي وأنا في رجاها
ولا لي بمطاميع الزّهد والزّوايد
عندي بجوب النفس بما جزاها
وصارت مهازرة العرب بالجحايد
حدٍّ رفع جزمة وحدٍّ وطاها
والرجل ما يرضى هباب الزهايد
والنّفس تجفي دايمٍ من جفاها
ولا خير في وقتٍ مضى بالحقايد
وجدودنا عند القبايل رماها
شلّوا الرحايل وانتحوا للبعايد
وتحوّلوا صوب الجنوب ونداها
الأصل ياسيٍّ وْمن شفْ زايد
ان كان قرّاب الجماعه يباها
ومن خبر كبّارٍ معهم مجايد
من بني ياسٍ رْسومي تراها
نسعى ولا معنا يا غير الجهايد
واللْه يعلم بالنّفوس وْخفاها
دارت دواير الفتن والنكايد
ولا حدٍّ الدّنيا سلم من غثاها
عذرٍ لأبو طحنون راعي العوايد
يا مقدّرٍ قول الرجال وهجاها
ماخذ حسين العود ضافي الجعايد
من رابةٍ ما خسر منهو جناها
صلاة ربّي عدْ خوص الجرايد
واعداد ما مدْ القلم وانتواها
على شفيع الخلق يوم الوعايد
لي نفلّه ربه وأسماه طاها
القصيدة في مدح الشيخ زايد بن خليفة آل نهيان
إسم الشاعرالبلدإسم القسمالمشاهدات
علي بن سعيد بن الضبع الدبياني الجنيبيعمان☆ شعراء العامية في العصر الحديث299