أسمحوا لي يارجال الشعر والرمي الوكادي | |
|
| أن حفظتوها نصيحه وأن قبلتوها هديه |
|
القصيد بوقتنا الحالي ظهر فيه الفسادي | |
|
| واللبيب يتوه تفكيره ورى هذي وذيّه |
|
كثروا الشعار واجد مثل عمدان الجرادي | |
|
| والقصايد واجده مثل النصوب العقربيه |
|
اختلط حابل ونابل والبياض اصبح سوادي | |
|
| والبنادق بعضها ترمى على غير الرميّه |
|
الله أكبر من هياط ومدح في بعض العبادي | |
|
| أغلب الامداح مرسومه على قدر العطيه |
|
المدايح بالدراهم شبه تحريج المزادي | |
|
| يمدحون اللى مايسوى شسع وحده من حذيه |
|
وأن بغيت الحق خلك عدل يمشي بالحيادي | |
|
| وابتعد عن شلة أهل التفرقه والعنصريه |
|
وانتبه تمدح بخيل الكف وتذّم الجوادي | |
|
| ليش تظلم ذمتك وتحسّب الذمّه بريه |
|
والقصيد بدون معنى بندقٍ ماله زنادي | |
|
| ولاّ قول مثل الطهاره لاحصلت من غير نيّه |
|
من يقول أن أعذب الشعر أكذبه يهدم مبادي | |
|
| الكذب مذموم مايفلح ولا يكسب قضيه |
|
خلّ مدحك قول حقّ ولو يقولون أنت عادي | |
|
| راح حاتم بالكرم ماعاد نلقى فيه زيّه |
|
والتفاخر بالهياط وقول ذبّحنا الاعادي | |
|
| ماذبحنا الابعضنا بعض واسرائيل حيّه |
|
ونعم جدّك وجدي كانوا اسيوفٍ حدادي | |
|
| لكن انسى وترك الماضي وعيش بواقعيه |
|
ويش يفيد الفخر في فعلٍ مضى هات الجدادي | |
|
| لا تظلي عند ذكراها تدقّ السمسميه |
|
وان بليت بشاعرٍ مغرور للفتنه ينادي | |
|
| ينقل البندق ويرمي بالفشق صبح وعشيه |
|
جيب له معنى مثيل النار من تحت الرمادي | |
|
| لا يكلفك أعتذار ولا تسبب في أذيه |
|
خلها تحت اللحاف ولا تزوّد فالعنادي | |
|
| من يكثّر فاللجج يفقد مقام ومقدريه |
|
وخلّ في مبداك صدق وخل رميك في ركادي | |
|
| واتبع العاقل وليمنك جهلت فسوّ زيه |
|
واللسان تخلي الرجال موثوق القيادي | |
|
| حكمته ترفعك فوق وزلّته تنحي نحيه |
|
والصلاة في الختام على محمد خير هادي | |
|
| الرسول المصطفى المبعوث هادي للبريه |
|
|