تاريخ الاضافةتاريخ التعديل
الخميس، 21 مارس 2019 06:06:17 م بواسطة جمال نصيرالخميس، 21 مارس 2019 11:33:02 م
0 40
فرع الحلاوة الأحمر
انت يا خاله...
وانت يا عمه
انت يا بت ..يا ست ...يا شابه...
شوفتيش أمي..؟
كانت ريحة السوق ف الضلمة
قبل أذان الفجر ...بحبه
رايحه تبيع كام كيلو البامية
و تجيب بيهم أكل الشهر
لحمة ...وفاكهة ...وكام كيس سكر
لجل تحلي العيشة القهر
كان يعجبني العيش لفرنجي
لما يكون متروس طعمية..
بس الأجمل.....
كان الفرع حلاوة الاحمر......
******
كانت أمي....
تمشي مسافة كدا كام كيلو...
رايحه وجايه
بس بترجع أول واحدة...
لسه وراها البيت ...واللمه
دايما كانت إيدي ف إيدها
إلا يادوبك
لما النوم - الله لا يسامحه - يفرق بينا
وانا تسيبني
كنت أتمرغ .. وسط الشارع
مايغركش الطول الفارع
أصل يادوبك ..أكتر من سنتين وانا بأرضع.....!!
واملى البيت بالطوب على أختى
كات تضربني...
أهرب وأفضل بره العزبة
جنب مقام سيدنا (الضيف)...
وأفض جالس...
تحت الشمس ف عز الصيف
أسأل طوب الارض ...وأعيط
فجأة أشوفها...
كنت أشم السوق على راسها.......
كانت خلطة من الطعمية...
على كام حبة جوافة طرية...
أو شمامة..
أو بطيخة ..
أو على ريحة الحمة النية...
كان يشغلني الفرع الأحمر
لما أشوفه ....كنت أزغطط..
وافرد بين الريح جنحاتي
أجرى أحضنها...
تنزل ...
ترفع جسمى الفارع...
فوق أكتافها
أخطف حبل حلاوتي الاحمر.. من ضفايرها
يخلص واحد..
ألقى التاني ف قعر القفة
*****
أه يا أمايا..
فينك يا امه
مش عوايدها
أيه أخرها....
حتى دى خرجت...قبل معادها
مين من صدرك يا امه حرمني..؟؟
والله ما عارف ..
كنت أنا نايم....؟!
وللا الدنيا العكره خدتني..من أحضانها
لسه ماجتشي...؟!
طب أتمرغ.....؟؟
هيقولوا مات مجنون ف غيابها
طيب ... فين الطوب فى الشارع....؟؟
وأضرب مين..ماهى كبرت أختي...
نفس حالتها....
طيب أخرج بره الحته...؟؟
وأسأل كل حريم العزبة..؟؟
فينها الحته...؟!
فينهم كل حريم عزبتنا....؟!
*****
غبتي يا أمي...!!
وانا هنا جالس أعد ف عمري
عدى العمر يا أمي ف لحظة...
وأنا من حبي....
عايش اللحظة بلحظة ف دمي
برضه يا أمي....تنسي حبيبك ......؟؟
تنسي كمان الفرع الاحمر..؟!
تاخدي معاك القلب الاخضر...
إنت نسيتي إن ابنك عيل..مهما بيكبر
طيب مين من بعدك يا ما..
تاني يحلى ف بقي السكر..؟؟
انا منتظرك...
*******
وللا اقولك....
كلها كده كام يوم ..وأقابلك
بس تعالى خديني ف حضنك....
إنتظريني ....
جنب مقام سيدنا (الضيف)...
أصلي هكون أنا عندك....ضيف
قبل ما أدخل قبري لوحدي...
واما يسيبني ولاد حتتنا...
وسط التربة
إنت خديني أنام على صدرك ...
وافضلي جنبي
مشي الايد الناعمة عليا ..زى زمان
خليني تاني أحسك بدفئك...أنا بردان
واما يجينى ملاك يسألنى..
إنت تردى...
أصل الخوف م الحق يا أمي
راح يرعبني
بس قليلهم إن أنا إبنك
واما أقوم م القبر يا أمي
والقى المولى عشان يحاسيبني
زى عوايدك....
إغسلي وشي وقلبي ف قلبك
من ماء طهرك
قولي لرب الكون ..ولربك
إني بحبك
راح يرحمني عشان أنا إبنك
مايو 2017
---
عامية..عن ذكريات الطفولة مع أمي
إسم الشاعرإسم الكاتبالبلدإسم القسمالمشاهدات
جمال نصيرجمال نصير 2مصر☆ دواوين الأعضاء .. عامِّي40
لاتوجد تعليقات