عناوين ونصوص القصائد   أسماء الشعراء 
الشعراء الأعضاء .. عامِّي > مصر > سمير الأمير > رباعيات

مصر

مشاهدة
1477

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

رباعيات

بلاد تجيب الاكتئاب
فيها العجايب..عجيبه
نصيب لكل نصّاب
ولكل مخلص..مصيبه
*****
علف التيوس يجى بسهوله
بس اللى عالف،سانن السكاكين
إعدل دماغك وافهم الفوله
فيه ناس مواشى وناس جزارين.
*****
فيه ناس مواشى وناس جزاريين
وكان زمان فيه ناس بشر
كانوا تلات تصناف مافضلش غيرصنفين
المذلولين بالرغيف، واللى قلوبهم حجر.
*****
ما اقدرش اقول آه
ولا اقدر اقول لأ
مهزوم أمام الحياة
دخلت جوه الشق.
******
دخلت جوه الشق رعب وخوف
أنا اللى كانت أمى دعيالى
بقيت اكيف نفسى حسب الظروف
وبقيت سجين يومى ورزق عيالى.
*****
حينمّروا الجزم وكل سنه تجديد
برسوم جديده وفحص ومخالفات
والمشى ف الشارع حيبقى بالمواعيد
بخط سير معتمد وبإذن م السلطات.
*****
بخط سير معتمد مختوم بختم النسر
علشان دواعى الأمن، حرصاً على الانتاج
وعشان ولاد الإيه يتفسحوا ع الجسر
من غير ما صوت الجزم يعملهم ازعاج.
*****
العجل طب وكترت السكاكين
مسكين لا حيل ولا حيله
فرحت ليه لما وقع صدام حسين
مع إنه شبهك ومن نفس الفصيله.
*****
أنا قلبى عريان وحافى
وجلدى توبى ولحافى
شفتونى والع جريتم
وماجبتوليشى المطافى.
*****
اعقلها يابن الناس وبطل كلام
لازم تكون ف المعركه فتوه
كل اللى شافطين دمنا اولاد حرام
واللى خدوه قوه ما يرجعش الا بالقوه.
*****
هانت عليك الدنيا ناوى تموت
ويكفنوك ف العراق بالعلم
يستقبلوك الملايكه ف الملكوت
وتفوت عيالك مقهورين حسره وألم.
*****
بانى عشوش غربان على اكتافك ومحتلك
ومسلكك ف العجين وبالعجين ذلّك
هوه المهيب الركن،هوه الملك
هوه اللى طول السنه مجّريك وف السبق شلك
*****
على عينه تاجر مستريح باله
بيشوف عيالنا عبيد ف قصر عياله
بيشوف سمانا حصيره واسعه ف صيفه
ويشوفنا حبة معيز سارحين على كيفه
*****
على عينه تاجر شد حيل الجوع
وسابنا نحكى و نفتى ف الموضوع
لأنه عارف إن اللى راح ما يجييش
وان اللى جاى معلول ومش ها يعيش
*****
على عينه تاجر والميزان مختل
على دمنا عايش فى حماية المحتل
سايق علينا الهبل ..بارم شناباته
وفوق تعبنا بيبنى استراحاته
*****
خش بدماغك ف حيطه لوكنت عايز تفوت
حتموته حاتعيش حاتعيشه حتموت
طريق وحيد للحياه ولا بديل للصراع
حتى يعود التساوى والأرض ترجع مشاع.
سمير الأمير
بواسطة: محمد أسامة
التعديل بواسطة: محمد أسامة
الإضافة: الأحد 2007/04/15 01:33:32 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com