تاريخ الاضافة
الأربعاء، 25 أبريل 2007 10:12:35 ص بواسطة د. فوزى أبودنيا
0 1148
(بريزة ورق)
(مفتتح)
زمن الغيلان الزرق جانا
واتمعشقت فينا المهانه
واتحولت فينا الشجاعة
لاستكانة
لما انتحر عمك عويس
يوم اغتصاب بنته بهانة
..........
......
....
..
.
(بريزة ورق)
مفرودة ملو الكف
تملى العين
طول الرغيف العيش
لكن مابتجبهوش
ولاتجيبلك
كرسى ف مكروباص واقع
جلدها الدافى
ف تلاجة الزمن اتكرمش
ولا وش العجوزة ف طوبه
غرقت ف بحر التمنى
والدلالات
بعد ماكانت بتدى
صبحت تقولى هات
وانت اصبحت:
تستحى تمديلها ايدك بالسلام
وتقدمها وانت مكسوف ف الكلام
كنت زمان اما كنت ادها
بلفها ف ننى عينى
وتحرسها الرموش
كات تنبت ف عينى حلم وردى
يلففنى شرق وغرب
يحسسنى انى سلطان زمانى
مهما كات ايدى تعتدى عليها
تفضل محتفظة بقيمتها,
لم تفقد بكارتها
كتير من المرات دخلتنى
السيما ف اغلا عرض
على حسها
كنت ازق المدفع اطرقع بمب
وادور ف الهوى
متسلطن مع المرجيح
كات تحسسنى انى اجدع واد
وانى فارس الاحلام
ف شلة البنت الحليوة .........
اللى بيتنافس على قلبها كل الولاد
وهيا اللى بتكسبنى ديما قلبها
طبق الكشرى
كان يشاورلى بحبال المكرونه الاسباجتى
ويلم عليا ولاد مدرستى
ويخلى عمى جودة
يجرى عليا من بعيد
يناغشنى...
...نهارك سعيد
كباية الحمص لما كنت اشاورلها
كات بترقص
ف ايد عم محمد بتاع حمص الشام
على باب شارعنا
كان يبوس ايدى ويسلم عليا
ويقولى يابن عمنا ابودنيا
حلاوة ابلتى المجنونة
كات مفتونه بيا
وتخليها تجيبلى الصندوق المفتوح لسه
لجل اختار منه اجدع عساليايه
وف كراسة الحساب
كات تدينى عشرة من عشرة
مع انى كنت بحل غلط
العجلة اللى كات بترفض يركبها حد غيرى
عند عم فكرى العجلاتى
كات تسبقه جرى عليا تقولشى طيارة
ويقولى طير من اجدع مطار
وعلى اجدع بلد انزل
الف بها شرق وغرب م السيدة لحد الحسين
ليله العيد كات اول ماتيجى
تعدى تعيد عليا
قبل حتى ماقوم ابوس ايد ابويا م اليمتين
لجل يعطف عليا بقلبها
النهاردة بمدها لابنى
اول ملاقاها بريزة ورق
فاتنى وطلع يجرى
إسم الشاعرإسم الكاتبالبلدإسم القسمالمشاهدات
فوزى أبودنيافوزى أبودنيامصر☆ دواوين الأعضاء .. عامِّي1148
لاتوجد تعليقات