تاريخ الاضافة
الأربعاء، 25 أبريل 2007 10:15:06 ص بواسطة د. فوزى أبودنيا
0 1347
البنت النعسانة
البنت النعسانة فحضن الخضرة
فاقت من حلم كئيب.
البيت المزروع ف عيونها خضار
انهار على راسها
واتهدت كل التكاعيب.
احضان البيت المرميه
فتافيت ...فتافيت
ف عنيها
عفاريت ...عفاريت
متبعزقة على راس الحلم الصاحى من النوم
............جنب النهر
ع اليل الشايل وياه احزانه ف منديله الاسود
.............دمعه وقهر
باب الضلمة بيفتح على وسعه
وبيفضل طول الليل
الحلم يوهط ف الضلمه لحد عنيه
ميشفش
فيلف ... يدور... ويدور
وكانه الساقية اللى مدورها التور
لحد ماتفضى قواديسها
اللى بتحدف ف النور
والبنت الفايقة من النوم
لساها................
بتدور ف الوقت الضايع
عن صورة للحلم المكسور ف سواد العين
بتجمع اشتات الافكار الهربانة
مش عارفه تجيبها منين
الصورة البهتانه الباكيه ف عينها
بتلملم اشلاء اللون الاخضر
من وسط طوفان الالوان
بتحاول ترسم من تانى نفس المنظر
من اشلاء الصورة
على جدار الحلم المكسور
لصورة اترسمت ف عيونها زمان
قبل ماتغفل عينها .... وتنام
ندمانه البنت انها نامت
علشان م الصورة اللى بترسم ملامحها
مليانه شروخ
بتخليها اما تبصلها تدوخ
فيضان الدمع ف عينها
بيدبل ف خدودها الخوخ
إسم الشاعرإسم الكاتبالبلدإسم القسمالمشاهدات
فوزى أبودنيافوزى أبودنيامصر☆ دواوين الأعضاء .. عامِّي1347
لاتوجد تعليقات