تاريخ الاضافة
الأربعاء، 25 أبريل 2007 10:19:14 ص بواسطة د. فوزى أبودنيا
0 925
اشارة مرور
وشد خطُوطك المرمية
ع الاسفلت
او......... ارخيها
انا رافض اعديها
اشاراتنا......
اللى محطوطة
على الطرقات
رفعناها وبادينا
وقلنا نمشى
بلا خطوط حمراء
بلا اشارات
وصدقنا لنفسينا
*********
ياواكل السم ف الفاكهه
وف الرغيف السوس
وشارب ف الدوا المغشوش
وماشى والطريق زحمة
مكسورة فيه كل الاشارات
تمد الخطوة ع الطرقات
يصيبك ف الجسد رهقان
مافيش صحة
على رجليك ماشى وتعبان
ومش قادر.........
تجارى خطوة الايام
بارخص سعر بيعت العمر
ومش دارى
سلمت الرقاب والروح
لعشماوى
يشغلك اشارة الموت
تفضل حمراء طوالى
ويفضل يرمى فينا الموت
ف قبر جعان مايشبعشى
ولايعانى...
تقول لمين
اذا كان اللى مسئول عنها....
بيحلفلك بالف يمين
بان الموت ماكان يعرف
اشارة او خطوط حمرة
وصدقناه
*************
يادارس علمنا المنحوس
مدارسنا بقيت بفلوس
وفاتحة السكة ع المتعوس
وناس قادرة
وماشية تدوس
اشارتها
خضراء طوالى
تقول لمين
اذا كان اللى مسئول عنها
بيقولك
وانا مالى
وصدقناه
**************
يابايع صوتى للخلا
وبتقولى تعالى ادن مافيش اشارات
وصدقتك
انا بدن ف عب الجملة
لم تسمعنى حروفها
ولما اسئل بتخدعنى
تقولى فيه كتير سامعين
وتنى ادن
صدى صوتى يرد عليا الف ادان
وانا الاهبل
بصدق كل شيىء ينقال
وحتى ردت الاصوات
بتخيلها صوت الناس
وكلمة جريئة بحلم بيها
فى اخر الكون
اتاريها
بتنعى ف كعب رجليا
وانا المخدوع
وقالو دى طيبتك الزايده
لاجابت يوم عليك فايدة
ولاعايدة عليك عايدة
واقول لمين
اذا كان الصحاب خاينين
وبيقولو..... كمان ادن
وصدقت
وتنى ادن
**********
يابانى فوق رغيف العيش
عمود اسمنت
انا ادمنت للتغريب
وللتعليب ف كوز الملح
وشجرى شاب وبطل طرح
وانا بنحت ف نفس الصخر
وانا بفحت ف نفس البحر
وبزرع عرقى
ف جبينى بدال م الارض
بيطرح ملح
يشق الجلد مليون شق
وتعصرنى الالام ف الجرح
تلسوعنى اقوم واجرى
مالاقى حد يوقفنى
طريقى خالى م الاشارات
وانا لوحدى
ومش عارف نهايته فين
وبتمنى لو القالى
ايدين ترسملى ع الطرقات
اشارة او خيال اشارات
واقول لمين
اذا كان اللى مسئول عنى
مش عارف طريقى منين
وصدقته
*************
إسم الشاعرإسم الكاتبالبلدإسم القسمالمشاهدات
فوزى أبودنيافوزى أبودنيامصر☆ دواوين الأعضاء .. عامِّي925
لاتوجد تعليقات