إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
أمبارح الطيب |
وسع ياواد لأمبارح الطيب |
جايلك يعزى |
والعزا واجب |
مين القتيل ياعمنا ماتقول؟ |
انا القتيل يابنى |
وانت اللى بحت بأسمى للقاتل |
وزرعت فوق قبرى |
صباره ورخامه |
وقلت ياما |
لكن كلامك زور |
لا انا كنت والى |
ولا ساكن أعالى الدور |
انا شخص عادى |
وكان مرادى.. |
النور |
لكن خفاشك المتآمر الباغى |
نشن سهام الحقد |
على قلبى |
وأديك بتاخد عزايا فى الشادر |
وانا اللى ايدى منبته ياسمين |
ولاعمرها اتمدت لغير الحق º |
بسلامها |
وكان ختامها |
طلقتين غادرين |
اقعد ف ريح قبرى |
عدد على الأحياء |
وسيب الميتين |
دا الحى ميت º واللى مات ارتاح |
وبكره تايه عن سكة اليوم ده |
إلا إذا حبيت تجيب الغد من بوزه |
حا ييجى خاضع مسالم |
للى راكبينه |
اما اللى بايعينه |
فى سوق الخرس والتيه |
فا دول الميتين |
فا عشان تعيش |
لازم تموت |
وان مت |
كون عالى الجبين |
ماتموتش محنى القامه |
وافردها |
والكلمة مهما تكون |
ترددها |
وتكون مخارج حروفك |
واخده راحتها |
من غير خجل أو خوف |
ودوس ع المر |
يحلالك |
وعاشر الأيام بحق الله |
وجيب لنا عيالك |
تخزق ف عين الشر بصابعها |
وتشترى بكراها |
بدراعها |
ولاحد يقدر يرجعها |
لأمسنا المهدور . |
وسع ياواد لامبارح الطيب |
قدم عزاه |
والعزا واجب. |