 إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
| وف حوش الدار |
| شجرة لبلاب |
| ودكة عجوزة بتتسند علي كتف الباب |
| علي قلب جدار مهدود ... الحيل |
| وخريطة راسمها علي وش الطوب |
| واخدة تضاريسه المشروخة ... |
| وبيسري ف عروقها الدود |
| وعيال عنقود |
| بتتجمع علي غصن الدرس في كل صباح |
| وبيملوا الحوش جري وتنطيط |
| م الباب للحيط ... |
| م الحيط للباب .... |
| أو يرووا شجر اللبلاب |
| * * * * |
| كنت أشاور ع الخريطة للعيال |
| موال قديم |
| عن مراكب شمس سابحة ف موج هدد |
| عن سنين راحت ... بدد |
| عن حدود متبعترة حبات رمال |
| وف عز شرحى للعيال ... |
| كانت تعدى أم الضفاير فى عنيا ... بابتسامة |
| تتكسر أغصان لسانى |
| يرتجف عودى ... يتفرط العنقود |
| * * * * |
| وتضمني الدكة العجوزة بالكتاب |
| صفحات ... أبيات |
| على صورة قلب لواد مجروح ... بسهم |
| وهم ف شال ملفوف على روس دراويش ... |
| إيد على خد بتستنى ف معاد كداب |
| شجر اللبلاب جنب الدكة |
| بيدب ضوافره فى الجدران |
| أقلب صفحات ... حكايات |
| عن بومة بتتعارك ويا غراب ... على فار |
| وحمار منهار ... من كتر الضحك |
| عيل بريالة بيتلقاها ف نص رغيف ... |
| عقلي بياخدنى للبت بتاعتى ... أم خدود عناب |
| شجر اللبلاب عمال يزحف |
| وأقلب صفحات ... حواديت |
| وعبيط بيحلم طول الليل لكن ... بيموت |
| وبيوت بتف الناس ف وش الصبح |
| وعجينة زحمة بتبلعهم |
| وشوارع منصوبة ... صفين ... دكاكين ... |
| بتارين ... |
| لعب وتنطيط ... تفانين |
| على ساحر واقف فى الميادين |
| وبخفة إيده |
| بيشكل م الواقفين حواليه ... |
| تعابين ....... حيات ...... وعقارب |
| والناس بحماس بتهيصلوا ... |
| فيمد إيديه ........... علي البدل الواقفة والفساتين |
| ويطلع منها حيتان ......... تماسيح |
| كان شمع الدهشة علي وش الواقفين ..... بيسيح |
| يسخن عم الساحر |
| ويخلي الناس تشوف الناس ........ كلاب |
| شجر اللبلاب .........عمال يزحف |
| والخريطة ع الجدار |
| بتسلم أغصانه حدودها .......... |
| أغزل من ريقي أكفان لحلقي |
| لما ما كانش بيد لساني أى جواب |
| شجر اللبلاب غطي الحيطة |
| بومة يأس تحوم علي وشي |
| قفلت كتابي ...... ودفنت عنيا ف رمل النوم |
| * * * * |
| في اليوم التالي جات الشمس |
| كنست حبات عنقود العيال ع الحوش |
| وأحوش اللبلاب م الحيطة |
| وارسم من تاتي خريطة ......... |
| مين يا عيال ..........؟ |
| مين يا عيال ..........؟ |
| مين يا ...............؟ |
| شجر اللبلاب كان غطاهم |
| واتغلغل في التجاويف |
| تتهز فروع القلب خريف |
| يتبعتر مني العنقود |
| * * * * |
| وعلي دكة عجوزة بتتسند علي كتف الباب |
| أرجع لكتابي ........ |
| كان لسة الناس عاملين دوشة |
| حوالين الساحر فى الصفحة |
| دوشتهم تتسرب زفة ........ وتروح ع الحارة |
| كانت البت بتاعتي |
| بتبيع تفاحها لغيرى |
روابط مفيدة
الشعراء:
الأعضاء:
زوار اليوم:
الزوار:
أقسام البوابة
تواصل
متابعة
