إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
للجزم في الناس مقامات |
ساعات بتعلى وتوطى ساعات |
وكل جزمة وليها حالات |
وكل واحد له مقاسات |
للجزم في الناس مقامات |
فيه جزمة ليها مليون وش |
وكل وش لزوم الغش |
مكان بتنفخ فيه و تفش |
ومكان توزع ابتسامات |
للجزم في الناس مقامات |
ودي جزمة مخصوص للتنطيط |
لو تبقى مرّة ف رجل عبيط |
بتخلي عقله بحر محيط |
والكل يديله احترامات |
للجزم في الناس مقامات |
وجزمة لما تشوت في الجون |
تاخد ف باطها كام مليون |
وتحول العاقل مجنون |
وتشعلل الدنيا هتافات |
للجزم في الناس مقامات |
وفيه جزم بتلف تدور |
ورنيشها كله كدب و زور |
بتوعدك بالخير والنور |
متبانش غير في الانتخابات |
للجزم في الناس مقامات |
وأما دي جزمة باشا |
مدهونة سكر وبغاشة |
ونعلها زي فراشة |
تفوت بخفة في الأزمات |
للجزم في الناس مقامات |
والجزمة دي يلبسها فقير |
ونعلها مليان مسامير |
يلبسها عقله منه يطير |
وكل خطوة دموع وآهات |
للجزم في الناس مقامات |
وأما دي جزمة ناقد |
يلحسها متشاعر حاقد |
بشوتة واحدة كتاب واحد |
بيبقى فارس للندوات |
للجزم في الناس مقامات |
ودية جزمة تمشي ف خير |
ووشها دا مداس للغير |
لكنها ف آخر المشاوير |
بتشوت صاحبها ع الأموات |
للجزم في الناس مقامات |
جزم كتير ف دنيا الناس |
لكن مفيش على رجلي مقاس |
قررت أمشي حافي خلاص |
إن شالله شوكة ف رجلي تبات |
للجزم في الناس مقامات |