إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
ألف لون والطعم واحد |
ألف لون والطعم مر |
فاكره يا أمي لما قلتي |
امشي تحت الحيط وطاطى |
مش مهم يقولوا واطى |
مش مهم تبيع رخيص |
من ساعتها سيوفى يا أمي راح نضرها |
عشقت تعيش جوه دارها |
واتهيأت لما راودها الصدا |
ألف لون والطعم أسود |
طعم تفاح الشيطان |
طعم الحيطان لما تشاور للخطاوى اثبتى |
فاكرة يا أمى لما قلتى |
بيع حصانك |
والتمن هات بيه لجام |
من ساعتها كل حاجة فيا سكتت |
حتى قلبى لسانه تهته |
* * * * |
عقارب الساعة ولدغة الانتظار |
والاحتضار فارد شباكه ع المكان |
ليه تعلميني أموت |
وأنا لسه يدوب |
باحسس على وش الميلاد |
ليه ترضعينى خوف |
ولما قلتى كون فارس |
جبتيلى حصان من خوف |
وسيف من خوف |
مبقتش عارف |
أنا ولا انت ........... مين فينا يكون الخوف |
ألف لون والطعم باهت |
تاهت الضحكة الشفايف |
خوفنا خايف |
م التشرد لما يبعد عن قلوبنا |
فاكرة يا امى |
لما قلتى |
امشي تحت الحيط وطاطى |
مهما تعمل انت ........... |
من ساعتها نخل ضهرى |
مال بوشه ع التراب |
أمد ايدى |
لجل أفرد فيه سنينه اللى انحنت |
وافتكر يا امى كلامك ........... |
وانحنى |