عناوين ونصوص القصائد   أسماء الشعراء 
شعراء العامية في العصر الحديث > مصر > إكرامي قورة > بتاع ال 3 ورقات

مصر

مشاهدة
2055

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

بتاع ال 3 ورقات

افتح يااسطى
شكراً
قرّب .. قرّب .. قرّب .. قرّب ..
فتّح عينك .. طرطق ودنك
شغّل عقلك .. شغّل إيدك حتى وجرّب
قبل ما اقول شبيك لبيك
وارمى بضاعتى على رجليك
عايز افضفض لك ياأخينا ولجل السعد يحط عليك
صلّى على اللى هيشفع فيك
بقة بصراحة .ز وكده م الآخر
مين غير ما احكى حكايتى ف ساعة
صاحب المصنع مات ياجماعة
وجماعته بقوا ليا جماعة
واحنا ف ساعة صفا يا اخوانا قالت لى: يا كيمو
لجل الود ما بينّا نديمو
لازم نخلص من أموال مرحومنا وصيته
وعشان بيتنا تبان أساساته
لازم نخرب ياجميل بيته
ماذا وإلا ..
حلفت بالخلع تلات أيمان
لو طنشت وسُقت جنانى
راح تستخدم حق الفيتو
المقصود يا اخوانا ودوغرى
أنا مش حاوى .. حرامى .. ونِوَرى
بس معايا تلات ورقات
وأنا بتاعهم
أول ورقة:
كتالوج زير
شكله مبهدل خالص خالص بس خطير
مين قال هات؟
علشان لما أقول أسرارى يقول لى السر ف زير
آخر صفحة ف الكتالوج
مكتوب السعر الغالى جداً تحت ملاحظة:
إكفوا الزير على بُوزه ياهوه
يطلع جورج الابن لابوه
بس لعلم السادة العملا
لما هتكفوا الزير على بوزه ينقط دم!
مين قال هات؟
حاجة تغم
مين قال هات؟
غالى جداً!
آسف جداً جداً مش مسوح لى أنزل قرش
علشان يفضل سُنسُن قاعد فوق العرش ّ!
وعموماً الورقة التانية:
كتالوج تانى عشان برميل
شكله قديم ولكنّه أصيل ومأصّل
كل مشاكل الغيط علشانه بتحصل
فى البرميل كام خُرم
الأول بيسقط جاز
والتانى بيسقط نار
والتالت لو تندَه منه غزة أريحا .. غزة – أريحا
يطلع صوت صوت وتبان الريحة ... يسرسب دم
كل فيران الغيط تتلم
على ترابيزة بوكر .. يلعب .. تخسر
يكبر أكتر .. ينزل دم
كل فيران الغيط ف جحورها تروح تتلم
أيوه يا أونكل .. أيو يا عم
شوفتوا السعر؟ .. مين قال هات؟
بردك غالى جداً!
عارف إنه ما يسواش نكلة
بس السعر يزيد يا اخوانا لما نريّل يوم على أكلة!!
مين عايز بقى برميل؟
طب أجيب واحد على الأبونيه؟
طب أجيب حاجة لحد ما تُفرج؟
حاجة تحزن
يظهر إن بضاعتى الغالية
مش لاقية ف القاعدة زبون
حيث الفقر الدكر الساكن جو جيوبكم
طالل منها ومطلع لى لسانه
راح ادخل ف المضمون
وآدى الورقة التالتة:
صفحة واحد .. كتالوج نملة
قِلة صحيح لكنْ يا اخوانا حمارة شغل
لو نضربها تموت من خوفها ..
تدارى كسوفها ..
تزيد فى الشغل!!
واخدة شهادة أيزو الطاعة العامية
لا بتهش ولا بتنش
لما البرميل يرمى النار فوق أم نافوخها تخاف م النار
تتخبى هناك تحت من الزير
صفحه اتنين .. نوع تانى منها
واخدة شهادة أيزو الشجب
لما النار تحرق ف هدومها
تدين بهدوء وبحب!
وامّا تزيد النار .. ف ثوانى ترمى هدومها وتعمل قعدة
تلم الشلة.. يقزقزوا لب!!
آخر صفحة .. نملة كَ ...
سبكم بقة من آخر صفحة
مين قال هات؟
النملة بتاعة الطاعة العامية .. بجنيه واحد
مين قال هات؟
طب يا جماعة .. بنص جنيه
..........
ماشى يا سيدى .. هاجيب م الآخر
عشرين نملة بجوز جنيهات
مين قال هات؟
آدى عشرة .. وكمان عشرة
آسف جداً خلصوا خلاص
هتودونى ف داهية يا ناس!
همه يدوب عشرين يا اخوانّا!!
أيوه يا أخينا .. النملة التانية بتاعة الشجب؟
كده م الآخر عشرة بقرش
مين قال هات؟
أدى ألفين .. ألفين .. مليون ..
وآدى كمان مليون
بتقول إيه؟ آخر صفحة؟
آسف جداً .. نملة وحيدة ومش للبيع
أديكوا فكرة؟
ماشى يا سيدى
نملة كسيحة بس عنيها بتشوف بكرة
لمّت حوالين منها النمل الصاحى
مدّوا إيدهم
لجل يشدوا الفجر التايه
تحت عباية الليل السودة
الواحدة بكام؟
ولا بكنوز الدنيا بحالها
دا هيه الأمل إن الدنيا تغيّر حالها
بكرة النمل دا ينزل هاتك هاتك
ثم يقرقض رِجل الكرسى لحد ما يسقط من فوق منه الزير
يتكسّر .. ياخد النمل شقافة الزير
ويسدوا خرام أوسخ برميل
تتحجز النار جواه .. يحرق نفسه
ونعيش ف هَنا
عندك يا اسطى ..
نزِّلنى هِنا
إكرامي قورة
بواسطة: إكرامي قورة
التعديل بواسطة: د. إكرامي قورة
الإضافة: الجمعة 2007/09/14 12:22:40 صباحاً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com