تاريخ الاضافة
الخميس، 13 سبتمبر 2007 08:29:30 م بواسطة د. إكرامي قورة
0 1265
يا قلب أغلى من الدهب
خليكِ جنبى ماتبعديش
من غير عيونك صعب اعيش
أنا لسّه باحلم بالأمل
مع إن كلمة "مستحيل" صبحت جبل
حجبت وراها النور
وسابت قلبى يسكن ضلمته
ما بين ضلوعى ودمعته
وانتِ عيونك شمعتى
نورى وطريقى ورحلتى
راح أشق ليهم ميت طريق
لو كنتِ ف الرحلة رفيق
أنا لسّه باحلم بالحياه
عصفور ورفرف فى سماه
فارد جناحه رغم إن الريح شديد
والأرض فيها ألف إيد
جاهزة عشان تقطع جناحه لو نزل
طاير ف دمعه بيغتسل
يمكن زمانه يوصله لأرض الحبيب
وساعتها راح ينسى التعب
يا قلب أغلىمن الدهب
وعروقه ماس
خايف لسيف اليأس يقتل حلمنا
ويكون خلاص
خايف لنبض القلب وسط اليأس يسكت
يتنبح
مع إن قلبى كل لحظة بيندبح
وجراح جديده يتتفتح
لكنّى عايش بالأمل
يا قلب أغلى من الدهب
جاهز يضحى بأى شيء يقدر عليه
علشان ينول حلمه الصُّغَيّر والجميل
وبرغم كل التضحيات
كتفنى حبل المستحيل
محتاج إليك
يا قلب أغلى من الدهب ...
محتاج إليك
لكنّى خايف يوم ما اضحّى
أضحّى بيك !!
علشان تعيش
وهأقول لك : ابعد
رغم إنك لما تبعد
صعب اعيش
إسم الشاعرالبلدإسم القسمالمشاهدات
إكرامي قورةمصر☆ شعراء العامية في العصر الحديث1265