عناوين ونصوص القصائد   أسماء الشعراء 
شعراء العامية في العصر الحديث > مصر > عبد الله الهادى > طاسه الخضه

مصر

مشاهدة
891

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

طاسه الخضه

مولود بشاير
رابع صباح من يناير
الدنيا فتحت لى
وشقشقت ليه الحياه
وبشبشت لى الكون
وزوقت لى الامل
على كل شكل ولون
وسبلت لى العيون
وسبسبت لى الحب
والنظره فين ما تدب
تلقى الحنان طبقات
واما الكاسات دارت
ودخلت فى مطبات
عش الأهات قرّص
ومشيت وانا محرَّص
من صفحة المجهول
طول السنين مكوك
والشوك ملا عمرى
والأمر مش أمرى
والقهر بيزيق
وليلاتى باتهيأ
إن الصباح الجاى
أفضل من اللى فات
ما بخافشى م الأزمات
لاكن با موت م الخوف
وقت انفصام المعانى
وما ليش طريق تانى
إلا طريق الحلال
بين الخيال والحقيقه
سابح فى تيارى
وبالِم أخبارى
من سلة الأوهام
وإن يوم حاولت أطُل
من فتحة ألأيام
أسمع كلام باهت
والقى الظنون تاهت
بين الجفا والصد
وأنَّده على غربتى
مسستنى منك رد
يا مسرفه فى الرفض
وتمللى عاصيانى
وتمللى بتدُقى
فى ضلوعى مسا ميرك
وف وسط فوازيرك
خيرى غلب شَرك
فتشت فى سرك
طلع الزمان غازى
والدنيا سايبهَ الغوازى
ترقص فى أيامى
وآلآمى متمدده
على فرش أفراحى
وجراحى متأكده
إن الدوا مغشوش
الحب تحت الوشوش
لا طعم ولا ريحه
والكُره مُرجيحه
بتطوح الفالح
يا بختى ياكالح
وما لكش برأمان
طعم الحنان حنضل
ريق الحنين مالح
ياصبرى يا فايح
من زهر أخلا قى
لملم بواقى الآسى
من عرض أوجاعى
يا شوقى يا ساعى
بين الجحود والجفا
خللى الوفا غيتك
ومودتك أغصان
وأروى عيدان الامل
جايز تنجينى
يا عشرتى باسألك
وياريت تجاوبينى
لو ناويه تنسينى
مين اللى هَيوصَلك
وأما الحياه تُنصُلك
مين اللى حَيلمك
وإن كان ولا يهمك
وخلاص مافيش إنسجام
متعكريش دمك
وما تسمعيش الكلام
وإتمطعى بالقوى
فى جنونك المرصود
من كونك الجارح
طلع الرصاص مقصود
إنى خلاص مرفود
وما ليش وجود فيكى
والحيره فى عينيكى
بترن فى ودانك
وزمانك المستباح
رافض صباح عودى
لمّا أنتى بتجودى
بالدمع والنهنهه
واللهفه والخضه
أيه لازمة العضه
وأنا جتتى هلاهيل
وركبتى خيل النداله
ورفعتى سيف التار
وإتجمعو الانصار
والكل بِيئاجر
طلع العفيف فاجر
وقع القتيل برواز
واتسبل العكاز
على قبلة الحسره
وفى شدة العسره
كف الدعا ما ارتاح
ولا قل معروفه
وتمللى من خوفه
داير على كعبه
والحقد بيلاعبه
والغدر ما لو حدود
وكأنى مش موجود
وكأنى خيط معقود
على صُرة الفاضى
بين الوجود والعدم
بتاكلنى أعراضى
وف عز أمراضى
باأشرب عصير المهانه
يا قلبى يا جبانه
والدق فيك دَوَّد
من كُتر ما إتعود
يدفن فى إحساسى
وشربت من كاسى
وسقيتنى من كاسك
وأما الهوان داسك
طرح الضياع حواليك
وقعدت فى الوحده
فاتح إيديك للخوف
والشوف بيعصرنى
لو بختى بصرنى
إن الطريق مسدود
كنت إكتفيت بىَّ
لا وقعت ف الخيه
ولاشيبت قبل الآوان
يا عمرى يا خسران
ولا فيش عقول فاهماك
ولا فيش ودان سامعاك
لمَّا العجز صابك
وتعبت أعصابك
ورا قِلة البركه
وانفضت الشركه
لا كن بدون إشهار
وف هيصة الأعزار
طلع الدهب فلصو
والمخلصين خِلصو
والمطعونين فى الضهر
شالو معايَّ القهر
لمَّا القضا قضَّى
يا طاسه الخضهَ
خليكى على راسى
لمَّا المعاصى تتوب
والدم يطهر
والشك يتبخر
من بحر وسواسى
وتشم أنفاسى
عطر الوداد فوَّاح
والقى الجناح جناحين
والجرَّاحين بلسم
وإلآههَ تتقسم
على كل واحد نوب
يا قدرى يا مكتوب
وماليش عليك إعتراض
فاض الانين منى
سيَّل على سنى
وغرقت ف الفيضان
وأمَّا الطوفان عدا
ما لقيتش غير قضبان
للسجن والسجان
سلّمّت أوقاتى
وقعدت أترحَّم
على كل أمواتى
عبد الله الهادى
بواسطة: محمد أسامة
التعديل بواسطة: محمد أسامة
الإضافة: الأحد 2007/09/23 03:20:54 صباحاً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com