 إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
| الواد حميدة الفنجري .. في الناحية معروف انه داهية ومفتري |
| كان حيلة أمه مدلعاه .. وارث أبوه .. ولا عنده حاجة بتشغله |
| راسي وتشوفه تقول دا ذوق |
| حلو اللسان .. لكن دا نصاب وابن حنت وألعبان |
| وف يوم شتا كاسي الغيوم والشمس يومها لم تبان |
| اده المعاد لمستكة ف ليلة عند المزلقان |
| البت حلوة مسهوكة ... بيضة وبدارة مدملكة |
| والعشق حلم ف قلبها والشوق لفارس عمرها |
| بركان بيجري ف دمها مولع شرار |
| وردة ويدوب لسة بنداها مفتحة |
| والواد معندوش انتظار |
| لا عمره حس بقلبها ولاهو شهم ولا ابن اصل عشان يقدر حبها |
| وجوه ف ضميره يضمها ف أغلى مكان |
| وف رأيه إن الحب خيبة وكل عاشق ف الهوى دا أكيد حمار |
| خطاف ويهبش أي عنقود استوى |
| صياد قراري وبهلوان ... تعلب ويلبد في الغيطان |
| يخطف ويجري ويختفي في الضلمة مش ممكن يبان |
| *** |
| والوعد كان يوم الخميس |
| في ليلة عند المزلقان |
| البت قالت لأمها ... مخنوقة حطلع ف المسا سوق النسا |
| راحة أجيب بخور .. وحجيب كمان فصين لبان |
| أصل اللبان ده له حلاوة في أوله |
| *** |
| يا بت أوعك ف الطريق تتمنظري |
| حسك وعينك تنسي نفسك ف الزحام |
| أوعك يا بت تتأخري |
| الليل غميق مليان ديابة |
| وافهمي مش كل عطر جميل بخور |
| مش كل بسمة بتاسرك بين الوشوش ... صديق بشوش |
| ولا كل كلمة تفرحك حتريحك |
| يمكن تكون سكينة تلمة بتتدبحك |
| الهي رب يحرسك |
| دا الدنيا داخلة على العشا لازم وحتما ترجعي قبل الادان |
| *** |
| البنت دايخة ف حلم فارسها الشجاع |
| حتشوفه عند المزلقان |
| كان الطريق ساكت... غطيس |
| حتى الشجر ما أتهز من نسمة هوا وغاب الصفا |
| والنجمة وقعت م السما والبدر من خوفه انطفا |
| .. والهمس والشوق والحنين اصبح جنون |
| والصدر نافر كالحصان .. والواد جبان |
| كان اللي كان .. وتفتحت كل البيبان |
| والقطر عدا مرتين ... لا دول تلاتة وأربعة .. والحب سافر ف السراب |
| واترمى عود البخور راح ف التراب |
| والحلم من يومها أتسرق .. اصبح كابوس |
| اصل اللبان ده له حلاوة في أوله |
| ومالوش مكان غير انه ف الأفواه تلوكه الألسنة |
| والمستخبي يجيلوا يوم حتما يبان ف ليلة عند المزلقان |
| *** |
| قصر الخيال تحت المطر بيت من ورق |
| ووشاح على كتافها أتحرق |
| والنذل داب وسط الزحام |
| ماحد عارف سكته |
| والخوف معشش جوه نني قلبها |
| وغاب الأمان. |
| *** |
| اصل اللبان دا له حلاوة ف أوله |
| ومالوش مكان غير انه ف الأفواه تلوكه ألا لسنة |
| أو ف التراب ينداس برجلين البشر |
| اصل الخبر لما انتشر |
| كانت الخطيئة اتكونت وتلونت |
| صرخة وليد ليلة شتا .. تمطر غضب |
| والقطر عدا مرتين .. لا دول ثلاثة وأربعة |
| لا حد سامع صرخته ... ولا حضن دافي يلملمه |
| ولا أم يرضع حبها |
| طب فين أبوه .. كان إيه أبوه |
| طور الوسية وسيبوه؟ ... يلعن أبوه |
| عجيبة يا هووه يا بشر |
| لا إحنا ديابة ولا حيتان |
| *** |
| يا زهور تفتح بالحياة يوم الربيع |
| أوعك ف يوم تستعجلي |
| العطر لازم تحفظيه |
| واستني أوعى تفتحي في الضلمة عند المزلقان |
| والشمس جاية ف وقتها وحتنوري |
| عود البخور خليه في قلبك أوعى يوم تستسهلي |
| تيجي الرياح وتبدد العطر الجميل |
| لمي الضفاير |
| والمنافذ جوه قصرك قفلي |
| الشهم عمره ما يختفي ويا ابتسامة مزورة ف الضلمة |
| أو نط الحيطان |
| *** |
| عود البخور لازم يكون دايما عبيره ف مهجتك |
| وحتلتقي الشاطر حسن |
| جي ف المعاد |
| فارس منور ع الحصان |
| وله علامة في كل باب |
| وأبو ضحكة مرة مزوقة |
| دبور وزن على الخراب |
| اصل اللبان دا له حلاوة ف أوله |
| لكن ف آخره يكون مرار |
| عود البخور دا اصل كل المسالة |
| ويجيلك الشاطر حسن ويولعه عند الادان |
| *** |
| نطلع على طول الطريق |
| نضوي الشموع |
| نغزل شعاع الشمس فستان الفرح |
| ونطرز النجمة البعيدة ف طرحتك يوم فرحتك |
| ونطل على قطر السعادة جي يزغرد من بعيد ..... في ليلة عند المزلقان. |
روابط مفيدة
الشعراء:
الأعضاء:
زوار اليوم:
الزوار:
أقسام البوابة
تواصل
متابعة
