إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
شباك قديم |
بتطل روحى منه ... |
ع الوطن البعيد |
وصوره تنسجها أيدين ... |
بتجمع حروف |
وبيقولوا إنها عربى |
ف تبان خريطه للوطن |
بهتان |
وكأن كل التاريخ ... |
ابتدى بالبدو |
وح ينتهى بإسلام |
كان شئ مهم |
إننا دلوقتى نتخانق |
تسمى ابنك إيه؟ |
وعشان أفادى الخناقه |
ومعترفش إن أنا مش عايز عيال |
قلتلها شوفى انتى |
فكرت ... |
وتبسمت فجاءه |
كأن جالها ملاك الرب... |
بالوحى القديم |
العرب فى فرنسا |
زى الوطن بهتان |
مش كلهم لكن كتير |
مبيعرفوش غير إن كان ليهم بلاد |
وكأنها جنه عدن |
فيها رئيس فيها ملك |
ظالمين يجوز |
المهم وف النهايه |
إنهم |
زى أجدادهم عرب |
قالت... |
عايزه اسم يكون جميل |
اسم عربى |
قالت كده وكأنها ... |
بتتكلم عن نبى ..نبى!! |
معقول أنا... |
اخلف نبى .... إيه المشكله!!؟ |
وفرحت |
معرفش ليه |
بس حسيت إنها فكره |
مجتش على بالى |
وبدأت أفكر ... |
لو بجد أتحققت |
وبقيت أنا ... |
أبو النبى |
التاريخ بيقول ... |
البدو مش أول حضارة |
والعلم والفلسفه والطب |
مش اختراع بدوى |
ولا احتكار ليهم |
استغفر الله العظيم |
قالت حتكفر |
يعنى إيه أبو النبى |
قلتلها بحلم |
قالت حرام |
الحلم زى العلم |
فيه الحلال و الحرام |
بكلمه تصبح |
شيخ |
وبكلمه تبقى |
كفرت |
معقوله كل الأنبيا كانوا يتامى |
وكل العرب من ارض الجزيرة |
وتقريبا معظم العرب ف فرنسا |
م المغرب و الجزائر وشويه من تونس |
تأكل كسكسى |
مبحبوش |
تبقى مش عربى |
الكسكسى ف فرنسا |
بيحدد هوية |
وليه معانى الانتماءوالوحده |
ويمكن الجنسيه |
مصيبه سوده |
أبو النبى |
ملوش ف الانتماء الكسكسى |
ولاحتى بيحب الرئيس |
ولا مره قال عاش الملك |
مش مهم |
بس النهايه انه مصرى |
ومصر هى أم العرب |
والعرب |
جايين بلاد الكفره |
مش عشان يتعلموا معنى الحضارة |
ويزرعوه فوق أرضهم |
مش همهم |
المهم يعلموهم |
أنهم من جنس تانى |
العرب جايين يشوفوا الكفره |
ويعرفوهم |
ولما القيامه تقوم |
ويخشوا ع الجنه |
يطلعلوهم لسانهم |
وهما جوه النار |
وأبو النبى محتار |
أنا مصرى ايوه عشان مولود هناك |
وكبرت وتربيت هناك |
بس مسمعتش |
إن مصر حبلت بالعرب |
معرفشى أصلى م الفراعنه |
ولا اغريقى ... يونانى |
ولا عباسى ... يابانى |
يعنى إيه الأصل؟ |
وليه انتمى للعرب من دون بقيت الناس؟ |
ولما تسأل مغربى حيقول |
عندى شجره |
فيها جدودى كلهم عربان |
وكأن كل البلاد قبل العرب |
مسكونه بالغربان |
أنا مصرى |
لكن قبل أما أكون مصرى |
أنا إنسان |
أنا بنتمى للوطن للحق |
مش لشجره |
أو بلاد متفرقه ... |
عايشه على ماضى قديم |
يعنى إيه معنى العرب؟ ... |
إيه اللى جمعهم سوى ...؟ |
اللغه...؟ |
متفرقه بينهم |
ومش كل واحد بيتكلم زيهم عربى |
الدين...؟؟ |
أنهى دين...!! |
فيه يهود وفيه نصارى ومسلمين |
النظام ...؟؟؟ |
زمبلك الأمير والرئيس والملك |
ما أجملك |
يا بلاد بتعشق ف الكلام |
م الوحده للسوق للسلام |
مش عايز احلم والنبى |
مش حبقى يوم |
أبو النبى |
وأبقى السبب |
ف عذاب لحد |
أنا مصرى ايوه عربى |
لأ |
وطنى الحقيقه ف كل شق |
لا عندى شجره |
ولاحتى فكره |
إيه اللى بكره |
حيبقى حق |
بس عربى |
برضه لأ |