تاريخ الاضافة
الإثنين، 12 أبريل 2010 07:51:36 م بواسطة المشرف العام
0 731
30
يا ليل مـا اطولـك للسـاري فمشـواره
صحراه ظلما وصبحه مـا حمـل ديـره
للبرد لـو شـب عزمـه تنطفـي نـاره
مـن ريـح الايـام والوقـت ومخاسيـره
عـدّت ثلاثيـن زايـد واخـر اخـبـاره
جالس يسولف عـن الضيقـات والحيـره
وان مـرّت الذكريـات يقـول لافكـاره
ايـام راحـت وعـدّت يـاالله الخـيـره
الله يذكـر زمـان اللـعـب واســراره
ومـدرسٍ لا زعـل يرمـي طباشـيـره
عقب العشـا نـوم والسهـران فـي داره
يحـل واجـب وينسـى واجـبٍ غيـره
فـي كـل هوشـه أحـد منقطـعٍ زراره
والصبح مـا للزعـل مـا بيننـا سيـره
حلـم الصغيـر ان كبـر فلـه وسيـاره
ياخـذ بهـا لاطفـش لـفّـه وتـدويـره
وبـرادة المسجـد اللـي فاخـر الحـاره
ارخص من ( الببس ) للـي قـل توفيـره
كلٍ يسولف عن ( التفحيـط ) واخطـاره
ولا جا ( مفحط ) غدينـا مـن جماهيـره
من يشري الخبز ما ينسـى ولـد جـاره
من ضيقـة المخبـز وزحمـة طوابيـره
حافيـن و( زفلتنـا ) مـا همنـا قــاره
واللي معه ( كنـدره ) يـا قـوّ تكسيـره
والملعب اللي ( حصاه ) اقشر من غبـاره
بابه من ( الشـوت ) منهـاره مساميـره
( من شوط ) نلعب ( حكمنا ) سهل نختاره
إلـى اذن المغـرب نخليـه ( صفيّـره )
كلٍ لـه اسمـه وكـلٍ عنـده ( عيـاره )
ومع كل ذا مـا نعـرف الحقـد والغيـره
الله يـاهـي سـنـيـن بـجــدّ دوّاره
تفـرّق الأهـل والأصحـاب والجـيـره
هاك السنيـن انتهـت عجلـه ومنهـاره
والشيب لو ما حضـر لاحـت تباشيـره
راحت ثلاثيـن والشاعـر وش اعـذاره
لـو مـا كتـب عـن ثلاثينـه معاذيـره
لو ان عمـره حديقـه تحضـن اشجـاره
عقـب الثلاثيـن تنكـرهـا عصافـيـره
فـي هالثلاثيـن كيـف يحسّـب اوزاره
ومن هالثلاثيـن عمـره كيـف تطهيـره
اتعبنـي العمـر واسفـاره هـي اسفـاره
واحلامي البيض تأخيـره بـلا خيـره !
مستقبلي ويـن ؟ مـدري وينهـا ديـاره
وانا اللي ابطيت فـي رسمـه وتصويـره
شهادتـي مالـهـا لـدروبـي زيــاره
كبرت معها وهي مـا زالـت صغيـره !
والوقت حلوه سكت فـي سطـوة امـراره
يمـدّ شــرّه ولا طالعـنـي بخـيـره
صحيـح كـلٍ بهـا الدنيـا لـه اقـداره
والرزق يحتـاج مـن يسعـى لتدويـره
لـه نافـذه مـن وراهـا تسـدل ستـاره
ان جـاه والا السبـب قسـوة مقـاديـره
طريقـي اظلـم علـي وتاهـت انـواره
مافيـه رجعـه ولا يـمـدي بتغيـيـره
يـا طولـه الـدرب للسـاري فمشـواره
ليله صحاري وصبحه مـا حمـل ديـره
للبرد لـو شـب عزمـه تنطفـي نـاره
مـن ريـح الايـام والوقـت ومخاسيـره
عـدّت ثلاثيـن زايـد واخـر اخـبـاره
جالس يسولف عـن الضيقـات والحيـره
إسم الشاعرالبلدإسم القسمالمشاهدات
زايد الرويسالسعودية☆ شعراء العامية في العصر الحديث731
جميع الحقوق محفوظة لبوابة الشعراء .. حمد الحجري ©