 إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
| حوار مع بلطجي |
| اسمك ايه؟ |
| بلطجي لكن شريف . |
| قلت ايه؟! هو فيه سفاح نضيف؟ |
| ايوا فيه و الفرق بينّا كان خفيف . |
| هو لابس بدله سودا و شكله متهندم تمام |
| له حَصانه و حاشيه تضرب ميت سلام . |
| عضو مجلس أو وصولي |
| كان بينهب مليارات |
| يملا بطنه و اللي فايض حوّله لبنوك جنيف . |
| أما محسوبك يا حسره |
| كان بيسرق كان بينهب كان بيقتل |
| لجل عدس و كام رغيف . |
| عمرك ايه؟ |
| خمن أنت عمري كام؟ |
| محتمل سنة |
| سنه؟!! |
| بص تاني في الملامح حط فوقها النص و اقرا وشي تاني |
| واقرا فيها سنين مرار |
| كنت بشحت لجل أأكل أمي و اخواتي الصغار |
| كنت أشوف ملايين كتيره زي حالتي في الدمار |
| في الدويقه |
| والسويقه |
| واللي جاعت ليل نهار |
| واللي غرقت في السفينة |
| واللي ولّع قطر بيهم و احنا بين أموات و نار . |
| كنت اشوف الغاز بيجري للعدو قدام عيوني |
| وألف واقف في الطابور . |
| كل همّه ف. اسطوانه |
| بس امتى يجيلو دور؟! |
| كنت ادوّر ع. الوظيفه و اجري ليها ألف كيلو |
| قلت ايه؟ |
| قلت شهر بطوله أجري عشان اجيب لي جنيه . |
| تسوى ايه؟ |
| واقعد احسبها يا بيه |
| التقيني لوحدي ضايع وسط شارع ويا صايع |
| أو حرامي و ابن ايه |
| يبقى لازم حل واحد إني اجاهد |
| قلت ايه؟ |
| ايوا اجاهد |
| همّ قالوا روح و قتّل أي واحد ف. الميدان |
| والميدان فيه ثورجيه |
| دول لازمهم بلطجيه |
| قلت مهنة فُل خالص . كام هنقبض؟ |
| قالوا الف جنيه معاها أكل كنتاكي اللذيذ |
| قلت اضحي لجل ادوقها |
| وامي و اخواتي الصغار . |
| طب قالوا لك إن دي ثورة شباب؟ |
| عاوزه تقضي ع. الفساد |
| عاوزه يطلع فجر تاني ع. البلاد؟ |
| لأ . قالوا لي دي أجنده . |
| قلت ايه؟! |
| قلت جاهل، طب منين أعرف أجنده |
| وعمري ما رُحت المدارس |
| عمري ما اتعلمت زيك يعني ايه ثورة شباب |
| يعني ايه الشمس تطلع بعد ما اسودّ السحاب . |
| يعني ايه تعليم و صحه و شعب نايم ع.الحديد |
| يعني ايه الفجر يطلع من جديد؟ |
| اصلي جاهل |
| أصلي سافل |
| يوم ما دبّحت ف. اخويا و ابن عمي |
| اللي أصلو من جدوري |
| واللي دمه زي دمّي |
| يومها بس عرفت معنى إنّ تدعي عليا أمي |
| روح يا إبني ربي مش راضي عليك |
| روح و قلبي بيلعنك قدام عنيك . |
| تُبت يعني؟ |
| ايوه تُبت و نفسي اكفّر عن ذنوبي |
| نفسي اطهّر ايدي من دم اللي راحوا |
| بس مين يستر عيوبي؟ |
| مش بلومك، مش بحاسبك |
| وادعي ربك |
| هوَ وحده يعفو عنك أو يعاقبك . |
روابط مفيدة
الشعراء:
الأعضاء:
زوار اليوم:
الزوار:
أقسام البوابة
تواصل
متابعة
