تاريخ الاضافة
الأحد، 3 ديسمبر 2006 12:49:00 م بواسطة د. جمال مرسي
0 1128
من غير سبب
]حادثةمساءالإثنين 24\4\2006م
في دهب بيد الإرهاب والتي كان معظم ضحاياها من أخوتنا و أبنائنا المصريين السائحين أو العاملين هناك
بالإضافة لما أحدثته من خسائر مادية و معنوية بغية ضرب السياحة و استقرار أمن مصرنا الحبيبة .
أعادتني هذه الأحداث المفجعة بقصيدة...
من غير سبب
من غير سبب
ماتوا الخلايق في دهب
و قلوبنا بالحزن اتملت
و عقولنا شيّطها الغضب
على إيد عصابة مجرمه
سفك الدماء ليهم سمه
سرقوا ابتسامة شعبنا
و كأنهم ..
مستخسرين الفرح يسكن قلبنا
زرعوا القنابل ، فجروا
قتلوا الخلايق ، دمروا
و الفل يوم شم النسيم شنقوه
و راحوا يسكروا
و يدوروا
على فل تاني يخنقوه من غير سبب
يا دي العجب .
***
عصبة بشر ؟
لأ مش بشر
مين اللي قال سافل يموّت حلمنا كان م . البشر ؟
مين اللي يقتل أبرياء مالهومش ذنب يكون بشر ؟
مين اللي يقطع عيش أخوه و يكون بشر ؟
قلبي من الحزن انفطر
و الوغد قلبه من حجر .
طابا و شرم الشيخ بتشهد غدرهم
و الجرح جوانا التهب
و اليوم بيزداد الأسى في القلب من صورة دهب .
***
في شرع مين بيقتّلوا
و عن الطريق يتحولوا
إرهاب بيجري ف. دمهم
لو يطلعوا أو ينزلوا
و بأي دين صوت الضمير بيسكتوه
يا ناس خلاص قربت اتوه
أصل اللي كان ..
سبّب لنا حالة تعب
و لا عمره ف. كتاب انكتب .
***
يا مصر اوعي ف. يوم يهزك غدرهم
ايدنا في ايدك ضدهم
هنقول لهم :
إرهابكو مش بيهزنا
لو حتى سيّل دمنا
و ف. كل شبر عزيز و غالي
م. الحبيبه مصرنا
هنقف لكم
نضرب بكف من الغضب
وش الجبان اللي هرب
بعد الأسى و القتل ف. الحلوه دهب .
.
.
.
و دمتم و دامت مصر الحبيبة بخير
شعر العامية
إسم الشاعرإسم الكاتبالبلدإسم القسمالمشاهدات
جمال مرسيجمال مرسي عاميمصر☆ دواوين الأعضاء .. عامِّي1128
لاتوجد تعليقات