الحياه مش كدا - بوابة الشعراء - بوابتك إلى عالم الشعر

القائمة الرئيسية

الصفحة الرئيسية

للتواصل مع الإدارة

تسجيل دخول الأعضاء

إحصائيات البوابة

عدد القصائد

53545 قصيدة

عدد الأعضاء

5428 عضو

عدد الشعراء

1195 شاعر

إحصائيات الزوار

عدد الزوار الكلي

216324 زائر

عدد زوار الشهر

13754 زائر

عدد زوار الأسبوع

3678 زائر

عدد زوار اليوم

771 زائر

التصويت

الحياه مش كدا

[b]

الحياه مش كدا

تتهز اللنض وتفضى الكراسى
وتبقى الشمعتين زى غفر التُرب
ها يسيل على التُلّى عَرق مِصفِر
تشاشى للرايحين وللجايين تغرق عنيك فى غُرزِة الخُدَاديه ..
لحد مايداريها القطن
هنا
ها تعرف مفاتيح جديده لهواك
وأقفال ها تترشق حواليك
دا درج مكتبتك .. دولابى .. طشت الغسيل
وها تقسِّم الكوبيات نفسها
للشاى .. للميه .. للضيوف العُزاز .. للدوا .. يتحطو جوه النيش
إيدك ها تتمد بعفويه تحت بزازها ، وهاتجرّب طريقه جديده ...
لدعك الحلمات بقشر لمونه معصوره من شويه ، ها تفتكر أحزانك الكتير و حاتعِب من بكاك ، وها تحس بالوحده اللى بترقع لك طراطيف مشاعرك ، أكيد راقبت فرحة إصحابك وشماتة المحرومين ، وعرفت دلوقت إنهم بيحسدوك ، عندك حمام لوكس وعروسه ها تدعك لك ضهرك بالليفه ، وأوضه ها ترص على رفوفها شرايطك وحبة حاجات يافطه لأى زاير إنك فولكلورى أصيل ومودك وابن حِنت وبتعرف الكُفت ، فتفرح بكتر الألقاب اللى نازله ترف عليك زى المطر ، ولأول مره ها تظهر قدامك علامات على إنك ضد التقسيم الصارم للراجل والست ، وهاتعرف إن راقات م الخيبه والعته النسوانى هايزيد ويزيد لحد ماتعلى طبقات الجرانيت فى جبال الراجل اللى مازال حابب شنبات المرجله اللى يقف عليها صقرين
هاتغيم عنيك فى الركن الضلمه
وهاتتلخبط كل الأسلاك
القمصان النايلو والبنطلونات الترجال
البز الناعم أبو حلمه طويله والإيد الشرشره اللى بترش الحنيه
الكلام والإشارات والضل
هاتتسحب تاخد ريق من عسل المجاملات اليوميه
- أهلاً أهلاً
- نورتونا
ها توزّع آخر فضا فى روحك ع المعجبين بعنيك
والمعجبين بقمصانها الشفتشى وبخفة روحها
وها تنتظر على آخر باكيه فى حدوتك
يمكن تكون هىَّ
يمكن تعدِّى على جرحها المفطوم
وتدارى خدك اللى بينز صديد
وتبتسم للعُرى وتفهم إن الحياه
مش هىَّ اللى عشناها قبل كدا
ولاَّ هىَّ اللى بنعيشها بكره
ولاَّ هىَّ اللى بنعيشها بكره
ولاَّ هىَّ اللى هانعيشها دلوقت .

[/b]

إسم الشاعر		مسعود شومان
إسم الكاتب		محمد أسامة
إسم القسم		شعراء العامية في العصر الحديث
تاريخ الإضافة		الخميس 29 مارس 2007 05:33:41 صباحاً
عدد المشاهدات		350