تاريخ الاضافة
الأحد، 18 مارس 2012 02:54:38 ص بواسطة المشرف العام
4 3543
تجنّب رذال الناس يا نسل الأجواد
تجنّب رذال الناس يا نسل الأجواد
وسلك طريق الهادي للرشادي
وسمع نصيحة عاقل إن كنت نشّاد
نصايح خزنةٍ في ضامر فوادي
وضحكٍ يجي في حضرة الوجه ما فاد
كم ضحكةٍ تحرق صميم الحيادي
أحسن جهنم عن مخاواة الأوغاد
وعن صحبة الجاهل ملاقى الأعادي
من رابع الأنذال يحسب نذل عاد
لو يكون جدّانه ثمودٍ وعادِ
ومن رابع العقال مالعقل يزتاد
لو يكون عبدٍ مكتسي بالسوادي
الفخر مبْ هوْ بالثناء والتمجّاد
ولا بالعمامه وطول الجدادي
الفخر لي يبسط الكف بالزاد
بالسيف والضيف ومد الأيادي
ويالآدمي عمرك ترى يعد بعداد
ما يجدّ قيضٍ قبل حلّ الجدادي
لا تخاف من هدّ العدو والتوعّاد
لي عمره بثاني ما يقصر بحادي
وترى سكون الذل فالقلب وقّاد
جرشٍ فقلب الحرّ نار العيادي
أنهج ودوّر من فضى الرّب مسعاد
الله يعيضك عن بلادك بلادي
نقل الحجارة من عرافيف الأطواد
أحسن وأستر عن ردود الرّوادي
ساير زمانط بالوهد والترفّاد
واحذر عن البطره وكثر العنادي
لو مالثمر ما احتنى الغصن وسّاد
ولا تشلّ ريش الطير كوس البرادي
لا تفرح يا بندوم لن جوْلك أولاد
دون الخرايف رثم غيم ونادي
كم من سيوفٍ أصلها ماس فولاد
ما جمّلت شلاّلها في البوادي
بديّ السلب عالقوت من كنت وستاد
وبلا سلب ما يحسبوك العوادي
يجلي همومك والنّغص والتنكّاد
ويزتاد حظك به وتلقى المرادي
لو تكون جوعان والسلب فوق الأوتاد
قالوا العرب شبعان حاله سدادي
ولو كنت تأكل مواكيل الأرغاد
لا بندق عنك ولا بو نيادي
حلّ السرى مبْ عنّك طاري ونشّاد
تحسب فجملة لابسلت العضادي
سلّي على نفسك بطرف التوهّاد
لي مغذّين خدها بمسك وزبادي
خذها طويله عاليه نايفه سناد
مخموصة الأقدام دعجا السّوادي
وتكون بنتْ أصلٍ وفصلٍ ومعتاد
عادات هاليها الكرم والرّفادي
ولحمٍ عليها بالمثل طرق حدّاد
شبه الّلديمي في خبوت البعادي
جاتك نتيّه تسير فالشعر نقّاد
شبه الزمرد في حروزٍ جدادي
تجلب لك الرزق من غير ميعاد
تجلي همومك والنّغص والسّهادي
لوٍ سمعها العمي في صوت قصّاد
برّق ولا عاد فحياته يقادي
ولوٍ سمعها ميّت من دهر شداد
قام وتنبه كنّه من رقادي
صلوا على المصطفى عدد صوت رعّاد
ما غرّد القمري وحنّ العفادي
والآل والأصحاب من غير تفناد
أبو بكر والفاروق شبل الأحادي
حمزه وعلي وعثمان ما نسيت مقداد
بن أسود الكندي سموم الأعادي