عناوين ونصوص القصائد   أسماء الشعراء 
شعراء العامية في العصر الحديث > مصر > أبو العرب أبو اليزيد > باحبك

مصر

مشاهدة
921

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

باحبك

مهاجر إليكي يا رحلة قوافل في لاربع جهات
.. ألامس خيالك واصور بقلبي ملامح جمالك ..،
، وأرسم بعودي أسامي عيالك في أرض التراب
وأحضن في طيفك في دنيا سراب
وادمع لوحدي
وادوب زي شمعة ليالي الفرح
وأحبس دموعي ف دواير آهات
واصلي الخمس صلوات والنوافل واصلي عشانك
واغافل عزولي واصلي لحبي اللي جاي واللي فات
وأحكي لزمايلي عليكي وعليا واقَرِّي لصحابي جواب كاتبه بإيدي ..
.. كإني استلمته من إيدك لإيدي – واكرر حكايتي
وارد الجواب اللي مني وإليَّا
وأصبر واطمن واعشم في نفسي
واقول يمكن أقدر اسلم عليكي
تعدي ف ميعادك معاكي صحابك
أحاول ما ابصش ولا انظر إليكي
واركز وابعتر واحوّل عنيّا شويه بشويهه .. ..
.. .. ليظهر عليّا أثر لارتباك
وتمسكها فرصه عليكي البنات
تعدّي واعد الثواني ف رجوعك
واعد الخطاوي اللي من مدرستكم لأول شارعنا
ولو غِبتي أقلق واروح لك بنفسي واشوف إيه الحكايه
واقابلك واعاتبك في نص الطريق – أعاتبك في سري!!
واكلم في واحد قريبه المسافه اللي بينك وبينه
عشان أبقى جنبك .. عشان تسمعيني
كان اللي جانبي ف طريقك سبب – ما هوّاش تَعَمُّد –
وأحود لأقرب مكان واقفه عنده
واكلم في أول صديق ح يقابلني
وأحكي وأدردش بأي طريقه ف أي كلام
واتابعك بعيني ولاحظك بعيني ان لقيتك مشيتي
.. أخلص قوام وابطل كلام
ويفهم صديقي ويسكت ويمشي ويضحك معاي
واعد الخطاوي والف ف ثواني تلاقيني قبالك
وتضحك زمايلك لكلمه تقوليها .. .. ..
.. .. وانا اضحك لوحدي معاكم عليها
تسلم عليكي البنات وتيبيهم ومش حاسه بيا
تمدي الخطاوي تشدك عينيا
تغيبي واعاود وانام وانتي فيّا
أغمض عينيا تجيني ف منامي،
، وكل اللي ما اقدرش اقوله تقوليه
تهفهف ضفايرك يرفرف حمامي
ونطلع وتحضن إيديا ف إيديكي
واقولك باحبك تقولي انت روحي
واشوف من دموعك جروحك جروحي
وتهديني صوره وذكرى ف جوابك
وأهديكي ورده تشيليها ف كتاب
وأكد معاكي ف مقابله بميعاد
وتمشي تسيبيلي المعاد في الصباح
واروح تاني يوم لانتظار الميعاد ..
تعدي بزمايلك ولا تعبريني
أفاجأ بإن المعاد ف المنام
واعدي ف طريقك عشان تلمحيني
ولولا الملامه لاقولك أديني
ناديني شوفيني .. .. ..
.. .. حرام توعديني ولا تقابلينيش
وتهمس في ودنك زميلتك سعاد
وتقرص دراعك زميلتك نيفين
، يميلوا بشعورهم .. وتضحك عيونهم ولا يهمنيش
ما عدتش بخاف – ح آيس واقولك باحبك واشوف
واجيب من خدودك حمار الكسوف .. ولو يعدموني ..
.. ح اكون قلتها لِك باحبك واحبك وكلمة أحبك دليل لاعتراف
وأهي موته الموته موته!!
لإمتى السكوت؟؟
ح أموت لاجل حبّك ح اموت باحترام
وإيه يعود عليّا بعيشة الخصام
كفايه إني ح افضل في قلبك ح اعيش
وح استنى حبك في نفس الميعاد
ولازم وحتماً ح آيس واقول
واشيل من عليا ملاية الكسوف
واصرخ بحبك في وسط البنات واقولك باحبك
وعدوا البنات بس مش م الطريق
وبصُّوا وشافوني وبصوّا لبعيد
يعدّوا أعدّي يعاودوا أعود
وحسّوا ف عينيا بحرارة السؤال
وجات واحده قالت ما تستنهاش
حبيبتك سابت لك عانا جواب .. تقولك باحبك
ترحّم عليها .. حبيبتك مسافره ولايمكن تعود!!
ترحّم عليها .. حبيبتك مسافره ولايمكن تعود!!
أبو العرب أبو اليزيد
بواسطة: محمد أسامة
التعديل بواسطة: محمد أسامة
الإضافة: السبت 2007/01/27 07:40:48 صباحاً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com