عناوين ونصوص القصائد   أسماء الشعراء 
شعراء العامية في العصر الحديث > مصر > نجيب سرور > رساله الى دفعه

مصر

مشاهدة
1381

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:

إرسال
انتظر إرسال البلاغ...

رساله الى دفعه

يادفعه راحت كام دفعه
يا خوفى ع الدفعه الجيَّه
يادمعه نازله م الشمعه
ورا دمعه بالنار مكويَّه
النار خيانه فى عز الضهر
آه م الخيانه وم الخاينين
لو ينغرز خنجر فى الضَّهر
الصدر يبقى صدر ياسين
وبهيه تبكى ولا تخبَرّ
مين القتيل والقاتل مين
وعرضحال واكتبى محضر
وكله ضد المجهولين
كلام يا دفعه مش معقول
ادينى عقلك واسمعني
قاتل و يصبح ليه مجهول
الشَّارى كتفنى وباعني
يا دفعه يا ابو زيد يا ابو مدفع
متغاظ منشن على سينا
ياهلالى فى الغيط فى المصنع
فى الجبهه ليه قالوا جرينا؟!
يا دفعه غيرك بيحارب
بالبنط الاحمر و الاعلان
وبيقلب المغلوب غالب
والكدب تقراه م العنوان
وديَّة الفانتوم خبطه
موجَّهه من أرض لجوْ
والحرب جد ماهش لعبه
ديتها فرقه تقول هاوْ هاوْ
واساتذه ياما فى فن الحرب
خلو الجمل فات م الابره
واحنا يا دفعه فى آخر كرب
بكره خياطه ورا البكره
خليك كدا على خط النار
مصلوب يا كبدى فى الصحره
وادى الشعار ينطح فى شعار
سكاكين بتدبح فى البقره
حارب بشرط ماتهجمشى
ولو هجمت ماتضربشي
ولما تضرب ما تصيبشى
هوَّش يا دفعه وكل محشي
ويضربونا نروح نحتج
ونقول يا هيئه ضربونا
وكل يوم للهيئه نحج
ملعون ابوهم لأبونا
تعال شوف شارع سليمان
دكاكين تبحلق للدكاكين
وفيها خير اشكال والوان
ونص بلدك شحاتين
والجرسونيره فوق جرسونيره
والفرش مفروش باللحمه
والسيره فايحه فى الجيره
والشرطه واقفه فى الخدمه
متاريس نضال عند جروبى
والامريكين .. ووراها شباب
يا خالق الخلق يا ربى
نسوان وليها ازاى إشناب؟!
واقفين يا دفعه ورا ضهرك
وكل خنفس ولا خنجر
صياد وجاى جايب قدرك
يهودى يعنى ومتنكر
وزير سيادته واقطاعى
بقى اشتراكى فى غمضة عين
ياكل دراعك ودراعى
ويسرق الكحل من العين
والرأسمالى مدير مصنع
والاسم مصنع متأمم
ومين هايقرا ومين يسمع
والغيظ يا حسره متلجَّم
وحضرته شايل دبابير
بالتوره تنهش فى اكتافنا
والحرب عنده زعيق وجعير
ياهلترى مين هايخافنا
ومجلس الشعب الميمون
وفلاحينه افنديه
الاسطى فيه لابس ببيون
وشعاره تحيا الملوخيه
يا دفعه راحت كام دفعه
يا خوفى ع الدفعه الجيَّه
يا دمعه نازله م الشمعه
ورا دمعه بالنار مكويه!!
نجيب سرور
التعديل بواسطة: محمد أسامة
الإضافة: الخميس 2007/02/01 03:09:10 صباحاً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com