تاريخ الاضافة
الجمعة، 15 فبراير 2013 12:23:04 م بواسطة محمد بن عمار
0 1095
نصيحة في زمن لايقبل النصيحة
بسم الله أبدأ وأبتدع زين الأمثال
نصايح ٍ مثل الدرر في نشايد
الخير له مدخال ، و الشر مدخال
والرابح اللي عن رداهن يحايد
زمان أهلنا راح والوقت به زال
وجانا زمان اللي قليل ، الفوايد
بيوت النشاما ، ذيك الأيام مدهال
تجمع قريبين الظعن ، والبعايد
كريم سبلا ، مااجتمع في يده مال
الفعل يثبت ما يبي له شهايد
مركي ٍعلى ضوه أباريق ودلال
ناره لهبها في السماء له وقايد
والقهوة يبهّر ، بها ،، أفخر الهال
تجلى العماس اللي على الراس كايد
أجيال راحت قبلنا وهذي أجيال
من طاع ربه صار بالعلم سايد
أقفت سنين ٍ إنقضت مالها أمثال
يوم الصقرله في الحبارى طرايد
وجانا زمان اللي معه قرش وريال
يشرون بالأموال شعروقصايد
ودام النصايح هالزمن صارن ثقال
بأخاطب أصحاب العقول الرشايد
الحلم ، عدّه سيّد ،، لكل الأفعال
والصدق مفتا ح ٍ لكل الوعايد
والعفو ، عند المقدرة ، فعل رجّال
تفخر به الأنجال ،، و كل الحفايد
والنفس ، لاتمشي على كل منوال
تجيب مع زود الفشيلة ، نقايد
وأترك مصاحب راعي القيل والقا ل
هرج ٍ يجيبه فيه ناقص وزايد
خلك على درب المراجل ولوطال
مهما يطول الدرب بالخير عايد
الحر ، حر ٍ مسكنه عالي جبال
مايارد الجيفة ،، ولاهي عوايد
والبوم ساكن في الخرايب ونزّال
ما بين خوص سقوفها والجرايد
الفرق شمس ٍ ماتغطى بغربال
لوتنشد (العميان)ما أبدى جحايد
والماء يجيبه ، من بيقدر .ويحتال
لاصار ، حلحيل ٍوقت الشدايد
ذرب اليمين معّرب الجد والخال
ما يمنعه قطع الرشاء في الحدايد
مدام (خرجه)فيه حبل ٍومحال
تارد ،غروبه ،، مثل ماكان رايد
وإلاّ الغشيم اللي بلا دلو ، وحبال
يهلك .!وظنه كل رمّاي صايد
ترى الدهر له صكة ٍ كل ما ، مال
يجلب على الرجّال زود النكايد
والدين يعمي العين في كل الأحوال
ا مفرق الأصحاب جمع وفرايد
الفقر ، ماميّز ، لطرقي ، و جمّال
ذبح الرجال مفصّد ٍ،، الورايد
طمّن عزيزين ورفع ناس ٍأنذال
ناس ٍ تظن المال ، يشري عقايد
خسران ياللي بالغنى مشغل البال
ربحك(ربا)يربى بكثر الرصايد
ترى الغنى بالنفس ياخبث الأعمال
والفقر ماعيّب ،،رجال ٍ سنايد
ياما فقير ٍ عايش ٍبأسعد الحال
مع الجماعة ،، كل عيد ٍ ، يعا يد
ويا ماغني ٍعايش بفعل بطّال
يسهر على المنكر وبذخ ، الموايد
يجاوب الآذان ، زمّار،، طبّال
ويصبح ، يدوّر للغطاء والوسايد
قلبه غفل عن كر قصّاف الآجال
يوم البشر تبدأ ، بجني الحصايد
تلهى ذوات الحمل في وضع الأحمال
والمرضعة تذهل لشيب الولايد
كل البشر مثل السكارى بالأهوال
ماهم سكارى عقولها اللي شرايد
فوق السراط اللي ينادي بولوال
الدرب ضيّق والبشر في تزايد
أحد انخدش وأحد ٍعلى البطن سحّال
وأحد ٍ نجا وأحد وقع في المصايد
يالله عسى الجنة لنا حظ ٍ وفال
يوم الندم ، للناس ، ماهو بفايد
يوم إن ظلك مابقى غيره ظلال
في موقف ٍ كل ٍ دموعه بدايد
وأختم كلامي عدّ ماهل ّ همّال
على النبي ، اعداد حّي ٍ وبايد
إسم الشاعرإسم الكاتبالبلدإسم القسمالمشاهدات
محمد بن عمارمحمد بن عمارالسعودية☆ دواوين الأعضاء .. عامِّي1095
لاتوجد تعليقات