وش حيلة القلب حب وراح محبوبه |
والحال من بعدها من سُوّ في سُوّي |
قطّع به الياس شريان الوصل صوبه |
توّه شباب وعليه الهمّ متْثوّي |
ماعاد تنفعني التوبة من ذْنوبه |
وْلا عاد تنفع حياتي ليتي ولوّي |
اهيم فيها واشقّق فالحيا ثوبه |
والدرب مظلم ونار الجوف له ضوّي |
من شافني حطني للناس لعبوبه |
يضحك وانا داخلي جمر الشقا توّي |
للريم فالقلب نار الغبن مشبوبه |
وانا ظمايه لها بالحيل متروّي |
ولّعتها يوم قيل الريم مخطوبه |
ما للدّفا شفّ منها القلب متكوّي |
وازيدها بالحطب لاقيل مغصوبه |
يالريم حكم القدر قاسي وش نْسوّي |
انسي وانا بآتناسى الحب ودروبه |
مادام حكمه علينا صار متقوّي |
عيشي حياتك ترى الايام محسوبه |
وانا بذكراك ضعفي يشتكي قوّي |
صارت حياتي طوال العمر مقلوبه |
من وين ماسوقها والحظ متلوّي |
لو لاحت بروقها فالغيم مكذوبه |
ما فاد منها الحيا بعد انخطف نوّي |
يالريم جوّك يبى يسقيك مشروبه |
صافي .. وانا ابْقى سببكم ما صفا جوّي |