تاريخ الاضافةتاريخ التعديل
الأحد، 26 أكتوبر 2014 09:33:08 م بواسطة لا تسولفلي جذبالأحد، 26 أكتوبر 2014 09:44:58 م
8 2419
تغطيت
تغطيت وبعدني الليله بردان
لان مو انت يمي فراشي بارد
وينك يادفو ياجمر الاحزان
احس بدمي بالشريان جامد
يا مر الصبر ماكضك عنان
نسمع بس صهيلك وين شارد
كل ساعه وتعتني جفوف بطران
وانا جلد العلي قماشه بايــد
تعال اوزن هموم وجيب ميزان
وشوف شكد عذاب الروح زايد
انسحبوا من حياتي هواي خلان
بقيت بهل زمان لوحدي اعاند
سواد الليل يبقى وتطفه الالوان
واعيد بذكرياتك والمشاهــد
اذا كل طير عنده ثنين جنحان
وانا مكسور وعشت بجناح واحد
على بير المنايا وجيت عطشان
مجبور وشربت الماي راكد
وينك يالبعيد الكلب مليان
غنا و بوسات ودمــوع وقصايد
وياك بعشرتي ياليل خسران
مثل عشرة النور وي الكواغد
لو طاهر حليبه الدهر ماخان
ضربني براسي غفله واني كاعد