تاريخ الاضافةتاريخ التعديل
الأربعاء، 29 أكتوبر 2014 11:27:17 ص بواسطة لا تسولفلي جذبالأربعاء، 29 أكتوبر 2014 06:43:39 م
0 1110
التاجر
إتريكت باكت صبر وكلاص هم
وتوكلت يارب عليــــــــك
غبشه، نعسانه الشوارع
ومدري يانثيه ابفجر دم تشتهيـــك
إتذكـرت تاجر اعرفه
كلـي من اتبيع روحك مرلي بلكت اشتريـك
وتمــت الصفقه اشتراني
وحصـتي هم رد اخذهــا
فكــر ابمشروع بي ادخــل شريك
وصــار يمليلي ابشروطه
.. ما اريد و .. ما اريــد
وما اريد ايــدك طويله
كتله اكــصرها واجيـــك
وابترتها من المتن ورجعت ابشره
كتله عد عينك شلتها !!
كــالي جا شلي بيــك
جــراح الحصـــــــار
ومن هــذاك اليوم والتاجر نسه وسد القضيه
وانه منسي .. امعلك اعله ارفوف صبري
وحتــى صار اتراب بيــــه
راحت ايدي اتفلشت اقوى الدفاعات
وخطوطي الاوليـــــه
ناس مقهوره اجت تبجي عليـــه
وناس بطرانه اجت تحجي عليـــه
اشلون غلطه اتسرعت كصيت اديـــه
.. هاي اديـــه
.. هاي اديـــه
صار تفتيش بسنه من السنين
وعوضت عن الهويــــــه
هاي اديـــه
ياما لعبت .. ياما قبل الريح هبت
ياما بصدور الثلج نيران هبـت
هاي اديــه
وهيه مكصوصه
شعر للناس كتبت
وصـفوا جراح زين ابمنطقتنا
حركوا بعض الرماد ابعود شخاط
وبعدها النار بيـــه
عفيه جراح الحصار البي حميـــه
وحده يكدر يكطع الخيط اللي
يربطني ابشرايين المنيـــه
.. إتفقنا
وصارت الصفقه بعيادة هل الطبيب
اخذ ايـد وانطي كليــه
وباشر الجراح وتمدد شخص مو من اهلنه
واخذ دم
وجيب دم
واصعد انزل
والوسيط الجابني ايصبــر عليه
خلص مفعول المخدر
فتحت ملكيـــت اديــه
حصدوا الكليه ولا زرعولي ايد
وقع الدكتور تقرير ابنسختين وتركنه
ولازم الفراش باب الصيدليه
الكادر اتجمع على اهل الغريب
ايهني بيهم
وانه بالسديه نسوني وياحزن ذيج المسيه
والمضمد راد حكــــه !!
كتله مد ايدك ابجيبي
لا لا .. مد ايدك ابصدري
يجوز هم تحتاج ريـــه
جابلي الفراش سر
وعرفت منـه تفاصيل القضيه
المريض الجان يمـي
كليـتي رهمت عليه وايده مارهمت عليه
واهلي زعلوا طردوني من العشيره
ومن فشلتي كمت اصيــح
انه مامحتاج اديـــن
انتوا شعليكم بديـــــــه
اتبرعت بيهن لان ما اريد
يوم اتوازى
واتنازل
وامد للناس اديــــــه