تاريخ الاضافةتاريخ التعديل
السبت، 2 يناير 2016 05:15:55 ص بواسطة محمد حمدي غانمالسبت، 2 يناير 2016 07:06:54 ص
1 396
ضميني من غير ما ألمسك
خليني أشوفك مرة واحدة
لو حتى كانت من بعيد
أنا قلبي كان عصفور وحيد
وف حزنه مسجون من زمان
بيغنّي من خلف الإزاز
من خلف قضبان الحديد
عطشان لحبات المطر
ولا يوم على بالك خطر
إنك خطر.. متحبهوش!
وتحطمي حلمه الوليد!
آه بس لو أصعب عليكي
وتطيّبي جرحي بإيديكي
أنا كنت أصير إنسان جديد
أيامه حلوه، حياته عيد
ياه يا قمر
دا أنا نفسي أطولَك من زمان
تشرق لي وتنور غيطان
تهدم حواليا الحيطان
وتبدد البرد الشديد
يا حلوة يا سايقة الدلال
هاتي براءة بسمتك
دليني أمشي ف سكتك
ولو اللقا أصبح محال
خليني بس أتنسمك
وأرسم جمالِك في الخيال
ضميني من غير ما ألمسك
عايزك بعيدة قريبة
سامعاني من غير ما أهمسك
صمتك أغاني جوه قلبي وضحكتك موال
وإن خُفتي من كتر البعاد
هابعت لليلك يحرسك
قلبي اللي باح لك بالغرام من غير ما قال
واستنَّى مطمن وخايف
فجاوبتي من غير السؤال
عن 100 سؤال
الحلم في ليل الهوى بيبدأ هلال
لو ليله ضاع من غير ما قلبك يسهره يصبح زوال
والشوق نضال
من قلب عايز يبتدي
يقطف عناقيد الأمل
طابت ف بستان الجمال
أو يشرب الخمرة الحلال
أنا شوفت من بين التلال
أجمل غزال
ماشي ومعاه النهر سال
شلاله من فوق الجبال
عذب وزلال
وأنا نفسي أشرب من زمان
عطشان وخايف أقترب
ليفر من خوفه الغزال!
يا خايفة من كل احتمال
الهجر فاق الاحتمال
بحلم أشوفك من زمان
بستان حنان
فدادين أمان
أمنيّة دافية وابتهال
يا اللي أنت خايفة من الهوى
لأ ما تخافيش
غيرك مفيش
لو إنتي حابة، أنا بعشقك
منتيش منيش!
وَيّاكي لحظة أنا نفسي أعيش
وأحرس جمالك م البشر زي الشاويش
واياكي يوم سهمك يطيش
أنا قلبي ملهوش حد غيرك
مليان جنون
مسجون ما بين حكمة وطيش
خبيني حلم ف بسمتك
خليني أطهر حاجة تسكن دنيتك
وتشوف بنورك
وإن كنت يوم غلطة ف ضميرك
ما تحبنيش
أنا كنت يوم بحلم أطير بجناح وريش
بس الفضا ما استنانيش
بعدت بعيد عني السما
مستسلمة
ولقيتني واقف وحدي فوق أرض العدم
من غير ندم
مستني إنك تيجي تاني يمامة ف عينيك السما
متبسمة
شفتيني ولا مشفتنيش؟
يا بعيدة وأنت قريبة
شيلي الحواجز كلها
خليني أبعِد لما أطير
لكني مطّمّن مفيش
ولا حاجة عنك تمنع القلب الرجوع
أنا عايز أهرب من حدود الأسئلة
وأعطش وأجوع..
للمستحيل
محتاج أقول لك ألف مرة أنا بعشقك
لكني متحنط قتيل
ما أنتي اللي عارفه إن القدر
بيوزع الحزن ف كاسات
يسقيها لقلوب البشر
ويا ريته كان قلبك حجر
علشان عليّا ما تحزنيش
لما أتوه عنك ف ليل
سامحيني يا ضي القمر
ف عينكي بركان الهوى لما انفجر
ما قدرش يوم يستحمله قلبي العليل
11/2/2013
إسم الشاعرالبلدإسم القسمالمشاهدات
محمد حمدي غانممصر☆ دواوين الأعضاء .. عامِّي396