تاريخ الاضافةتاريخ التعديل
الأحد، 8 يناير 2017 11:09:09 م بواسطة بدرية البدريالإثنين، 9 يناير 2017 12:42:34 ص
1 621
أقرب لتلويحة قصيدة
حزننا المورق على الأسطُر قصيده
ملّ صدرٍ كثْر ما يحويه ضاق
كلّ أرض نْمرّها غربة جديدة
والسّلام اقْرب لتلويحة فراق
نلفظ انْفاس اللقا واحنا نريد
ويْتشابه حينها هجر وْعناق
حلمنا المزروع في قِبلة وحيده
له نصلي الْخوف ونزيد احْتراق
للنهايات اللي نحسبها سعيده
للبدايات اللي جتْ دون اتفاق
مِثْل وجهٍ تسْكنه دمعة عنيدة
ساق من عمره لها فرْحه وساق
كلّ شيٍّ كان يستوطن وريده
ملحها الطافي على ما جاد فاق
في حناجرنا نمت غَصّة شديده
جرحنا الغافي على يْديها اسْتفاق
نستجير مْن الْوجع، كمْ طال قيده
وما عرفنا من يدينه الانعتاق
نخطي وْنفس الخطأ نرجع نعيده
نركض لْوجه السّما .. متنا اخْتناق
ما بقى للعُمْر من شمعٍ نقيده
لا أماني/ لا مواعيد وْرفاق
نمشي وْنمشي ورحلتنا بعيده
زادنا حيرة ووحْدتنا شِقاق
ما وصلنا غير لاحْزانٍ أكيده
كلّما نرخي تشدّ بْنا الوثاق
صاحبي: والخوف وظلاله العديده
تجبرك تمضي إلى ما لا يُطاق
دام هَذا العُمْر صادق في وعيده
والسنين اقْدام واللحظة سباق
خلّ ضيق الأرض وارحل بالقصيده
لين يوسعْك الْمدى وصْل وْعناق
القصيدة المشاركة بمهرجان الشعر العماني العاشر. رابط القصيدة في اليوتيوب https://www.youtube.com/watch?v=8kMmwky6XuI
إسم الشاعرإسم الكاتبالبلدإسم القسمالمشاهدات
بدرية البدريبدرية البدريعمان☆ دواوين الأعضاء .. عامِّي621
لاتوجد تعليقات