تاريخ الاضافةتاريخ التعديل
الجمعة، 22 مارس 2019 02:17:15 م بواسطة سمير الأميرالسبت، 23 مارس 2019 12:04:18 ص
0 64
فؤاد حداد
ما بيفقدكشى المعنى ف التوهان
ولا بين حيطان السجن يا إنسان
حداد وشاعر والحديد بيدوب
من شوقه للعاطفه فى غربة المحبوب
***
وأنا يوم ما زورتك كنت بالأفرول
هربان من المعتقل اللى ما دخلتوش
شايل فى جيبى كلام عن التضحية
لكنى خايف من عنيك تكشفنى
وتبصلى من فوق لتحت.. تكسفنى
تسالنى عن جيل مش مخلص النية
عن سكك الضلال والهبل!!
وشعر شبه الشعر.. مش بنى آدم
قبل المصيبه ما تحصل استأذنت
وقلبى كان ندمان وميت خجل
حسيت ساعتها إن أنا اتبدلت
وما عادش عندى للكلام اسباب
كنى ابتليت بالصدق وانا كداب
طلة عنيك علمتنى الخشوع
فبقيت مريد فى حضرة الصدّيق
ادخل قصايدك فى الليالى السوده
ووقت الضيق
احس نورك فى" دبيب الأمل"
واسرح بشوقى فى انتصار الحياه
وفى التاريخ اللى كان شايب" وشعره اسوّد"
فى هوشى منه وجيفارا وجمال
فى شعب مصر اللى بانى الهرم و السد
وف سجن كان فاتح ع الوطن بوابات!!!
ما بيفقدكشى المعنى وانت حزين
يا والد الشعرا فى بحر حنين
كتير بيغرق لكن كتير عايمين
والبحر موجة فرح وموجة أنين
وانت اللى فاتح للمشاعر بوغاز:-
غنى لهواك ياولد لوحتى لحنك نشاز
وعز ناسك ياولد ده كل اهلك عزاز
مستنين رجعتك بمنتهى الإعزاز
الموت ما يغلبشى اللى زارع قوافى
والا اللى كان فى الوحات حافى
بيعلم السجان إن القليل كافى
لو النواية سليمة يبقى البلح وافى
والرك على النيه وع الانسان
وانت فؤاد الوطن نبى وفنان
على نغم شعرك تنطق الجدران
وتعترفلك سقعة الزنزانه
إن الغناوى دفا والمحكمة عريانه
وان الغناوى عفا والمحكمة عيانه
وان الغناوى وفا والمحكمة خوانه
إسم الشاعرإسم الكاتبالبلدإسم القسمالمشاهدات
سمير الأميرسمير الأميرمصر☆ دواوين الأعضاء .. عامِّي64
لاتوجد تعليقات