تاريخ الاضافة
الثلاثاء، 9 يوليه 2019 11:08:47 ص بواسطة حسن إبراهيم حسن الأفندي
0 26
اسمك تقول سكر
بخوض النار عشان خاطرك وأتجسر
عشان تكبر
وتتكبر
وتتجبر
وتتبختر
وتتبطر
وتتعطر
وتملا السوق ...قمح سكر
عشان ما إنت مالكنا...
حبيبنا اللينا ما اتنكر
ولا في يوم بعاتبنا
مهما كان ولا قصر
أبو اسماعين أبو المهدي
أبو الدينمو اسد منبر
حبابك يا عظيم الشان
حباب اسمك تقول سكر
رجال يبنوك ...رجال يحيوك
من تاني وهم أسودك العسكر
صغيرنا كبير وكت بي ثورته فجّر
ومهما كان نومنا طويل
وليلنا طويل
نشد الحيل
تجيك أسود باسمك يا وطن تزأر
تقول سودانا ما بتهان
حاشا وحاشا يا سودان
بكرة تشوف
نرد للماضي نكرم لليجونا ضيوف
وخيرنا يرش
ذي موية دش
ونيلنا الصافي لو عكّر
مين يقدر ومين يقدر
يقاوم فيه للتيار
جرف تورا جرفلو حمار
وخلى الدنيا توقد نار
حبابك يا أبو الثوار
علمنا الدنيا كيف بنثور
وتقلع حاكما موتور
أكتوبر كان عمل ثوار
رجب العزة فخر فخار
وهو الزينة للثوار
ربيعنا قديم
هز عروش
زلزل لي بلاط
جبار ودكتانور
اخدلو سنين
كأنْ ما في ذيه قرين
وكت ناسا كتير نايمين
وما عارفين
يعملوا إيه مع الجبروت مع الظالمين
وبكرة قريب وفي وقت قصير
تشوفوا وتسمعوا عنا كتير
ود حبوبة وبت الخير
دا يهز
ويلز
ويقدل سيفه وراسه لفوق ما بيفز
وبت الخير تملانا حماسة
قوية خلاص
ندك سجون ... ونهتف بي صوت واحد عالي
مانا نبالي
كفاية نخاسة
كفاية تعاسة
بشعر رصين
ومعنى متين
ونحن نقاوم
ولسنا نساوم
للظالمين
سودانا حبيب وعالي مقامو
لابدَّ يفيق ويلغي سريره
ويلغي منامو
إسم الشاعرإسم الكاتبالبلدإسم القسمالمشاهدات
حسن إبراهيم حسن الأفنديحسن إبراهيم حسن الأفنديالسودان☆ دواوين الأعضاء .. عامِّي26
لاتوجد تعليقات