تاريخ الاضافة
الإثنين، 26 مارس 2007 05:54:50 م بواسطة صابر فرج
0 589
الليل لابس عبايته
الليل لابس عبايته
الليل مروح
لبس عبايته وجزمته السوده
وهوه طالع من الأوضه
أخد من الرف اللى جنب الباب
علبة الكبريت
وعنقودين من حب
ولاسابشى حتى ضحكتين
بايتين
0000
وسابنا للصبح المطير البارد
وانا العجوز المكحكح
هبيت فى وش السقعه بالنبوت
نزل المطر اكتر من امبارح
وهد البيوت
0000
اخدت خيمه جوا مأوانا
والصحرا قدمنا
وموتانا
بتطل بوشوشها
على بكرانا
بكرانا هوه النهار ده
وامسنا الغابر
واذا اتسرق أمسنا
فكل شىء
مسروق
دفء البيوت مسروق
والحرف عاجز زينا
ومخنوق
0000
ماهو أصله لما كان طالع من الأوضه
لابس عبايته وجزمته السوده
أخد من الرف اللى جنب الباب
علبة الكبريت
وعنقودين من حب
ولاسابشى حتى ضحكتين
بايتين.
إسم الشاعرالبلدإسم القسمالمشاهدات
صابر فرجمصر☆ شعراء العامية في العصر الحديث589