إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
الشعر عشق الخيال والجمال والفن... |
طاعة الإله حب الرسل صنع الحياه حب الوطن... |
الشعر مش حيثما و كأنما ولذا و كان كأن... |
ومش طلاسم ولا وصلة غموض مع مود ما يفهموش الجن... |
الشعر زى العواصم هو مدينة المدن... |
الشعر وقت الالم زى الجريح بيإن.... |
وقت الفرح زى القلوب بيحن... |
الشعر عشق الخيال والجمال والفن.... |
يعبر عن القلب ال طاير م الفرح... |
ويوصف حال القلب ال من نظره اندبح ... |
الشعر له مقام وله طواقى و سبح... |
الشعر ذاد في المقام لما ف نبينا مدح.... |
وصلة نشيد درويش عاشق جمال النبى سمعه الحجر.. قام حن.... |
الشعر ارض و وطن وبحور وبيوت... |
الشعر غيط طارح وله سواقى و مساقى والضله شجرة توت.... |
الشعر عُقد فى حجر الصبيه والحَب شوق مفروط... |
الشعر بيشد ضهر الجدع لما الصحاب بتموت.... |
الشعر كان هو الحقيقة وقت أما غلب الظن... |
الشعر مش ملزمة ورقه وقلم... |
الشعر يعنى الدوا وقت الشعور بالألم... |
يعنى اللسان اللى يصرخ ويقول فُلان اتظلم... |
الشعر زى المقدسات فيه حرام وله حرم ... |
الشعر زى الجمهورية له سلام وله علم.... |
الشعر شعب من الشباب مهما كبر ف السن.... |
الشعر رافض يعيش ع الهامش.... |
رافض يكون مش عايش... |
رافض يكون مُستأنس أو حتى مُتعايش.... |
رافض يكون قشه فى مجتمع هايش... |
أو حتى كلمة زيف من حَنك طايش... |
الشعر زى المعابد له أدان أو جرس بيرن.... |
الشعر وطن مالهوش حدود.... |
نيلُه نهر من المشاعر بين القلوب ممدود.... |
وطاقه متولده من غير ما نبنى سدود... |
الشعر نغمة وتر حاضنها خشب العود ... |
الشعر راعي الأدب ماضي عشانه عهود... |
الشعر له كلمه.. بتنور الضلمه.. وبتفتح المسدود... |
الشعر زى الأولياء |
مايكولش جسمه الدود.... |
الشعر رافض يندفن. ومالوش كفن. عمره ما يوم صابه العفن.... |
الشعر ملجأ للغلابه فوق جبينهم تاج... |
الشعر جلاد العصابه فوق ضهرهم كرباج... |
الشعر محراب الفوارس للمخلصين معراج... |
الشعر مقبرة اللى مارس الكبر م الابراج.... |
فضح اللى تاجر بالغلابه وساوم المحتاج..... |
فضح اللى تاجر بالعقيده وبفكره فجر وطن... |
الشعر حارب اللى خرب على الناس فرحها.. ونصب شباك الفتن..... |
الشعر نسف تاريخ اللى صنعو.. من الحاكم وثن.... |
الشعر مش قادر يكون ..غير الخيال والجمال والفن.... |