تاريخ الاضافة
الخميس، 29 مارس 2007 01:19:23 ص بواسطة محمد أسامة
0 1126
كانت ساعتها وكنت
كانت ساعتها وكنت
ــــــــــــ
عيل وانبط على خراه
إيه تعمل نملة سليمان وعصاية موسى لجلابيته
فيه فوانيس يمتى
مش يمتى
بتنطفى
وحيطان عليها عيال بيلعبو بالبيضه والحجر
وبزاز سايبه تقولش سيل وحَدَفُه ربنا
ياسلام يافاطنه
كوعك خبطنى وكان القطر صفّر
وانا رابط على جسمى عِقال مليان خواتم
وكنتى مِكّممّه بالقطن الابيض
وغوايشك يامشالله تجر الراجل من دول
من ياقة جلابيته وتمرغ بيه الأرض
كانت ساعتها التُوْكُسَا حبه كدا
والواحد كان يفضل مرعوب
وانتى بقى اتحففتى بحلاوه ونتفتيهم
ووشك كان بيفج
ركبتى بخمسه فضه
ودخلتى السيما بقرشين
وفتحتى سدرك لِ ليل وحدانى
وقعدتى تجرى فى ديل فستانك
كإن البلاد دى تعرفك
وكإنك ما عاشرتنيش
ُقلتى آهى دى قهاوى
ودى جوامع خرسه
ودا شمعدان وحصان حلاوه
أجيبه ل "شحته"
ورجعتى بايعه شبشبك
وحطيتى بوسه على خدى
زى العسليه اللى ف إيد "بخاطرها"
دى طلعتك
ودا بيت عمى "سيد الزَّمَامرى"
قاعد بُعافّطته كإنه بيحفظ قرآن
وجنبه ابنه "زلط" ناطر شعره على وشه زى الشبيحه
وبيحكى للبنات حكايات عن عيله تاهت ولقاها المارد
بس ماسبهاش إلا اما عمل فيها وسوّا
هيّا دى طلعتك
وانا مدفوس فى لحافى
وحفانك يملا الميه ويطص وشى واكركر
وساعات أقولك إن شالله تموتى ياوحشه
وفى سرى أقول بعد الشر
دا ضفرها اللى يطيره طرف المقص بالدنيا
واحضنك وانام .
إسم الشاعرالبلدإسم القسمالمشاهدات
مسعود شومانمصر☆ شعراء العامية في العصر الحديث1126