عناوين ونصوص القصائد   أسماء الشعراء 

مصر

مشاهدة
1453

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

عن

عن ورده لسه بتطلع السلم
من غير ما تمسك فى الترابزين القصير
عن سنانها الببضا
اللى بيها بتعرف تاكل الدوم
وتكسّر البندق
عن شعرها الاصفر
عن الحواديت النونو
اللى بتحكيها لامها بعد نص الليل
عن المايوه الواسع عليها
اللى شدُّه الموج فى راس البر
وإحساسها بحريتها
عن لعبه بتحبها من وسط اللعب الكتير
اللى جنب مكتب ابوها
عن صحابها اللى بيشدوها من شعرها
وصحابها اللى بتدوخهم
عن وش طيب زى وشك يابا
هاغنى غنوه نصها مقروط
لبنت لسه ريحتها فى هدومى
إدتنى بوسه ...
وهيَّا بتطلع السلم
من غير ما تمسك فى الترابزين القصير
أو فى إيدى
وسابتنى اكمل غنوتى
عن طفوله نصها رُوبَه
وتوت وبلح صيص وغيام
ونص مش فاكّرُه
عن فلكه متعلقه
وفيها رجليّا
عن نعش لونه اخضر
فى وسط الجامع
وعنبه مابتطرحش غير حُصرم
وكوز صفيح مالينُه بالسبغه
ولوح أُردواز
وريشه غاب
وشيخ بِعمه لون خضار قلبى
واسمه متولى
دايمن بيضربنى بفردة القبقاب
عن الأحلام اللى طارت
والأحلام اللى بتطير قدامى دلوقت
بغنى غنوه مكسوره
مش قادره تطلع أول السلم
بس بتبتسم
لبنت طالعه
من غير ماتمسك فى الترابزين القصير
أو فى إيدى .
مسعود شومان
بواسطة: محمد أسامة
التعديل بواسطة: محمد أسامة
الإضافة: الخميس 2007/03/29 05:25:45 صباحاً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com