تاريخ الاضافة
الخميس، 29 مارس 2007 02:19:05 ص بواسطة محمد أسامة
0 1174
شبوره
شبوره
ــــ
الوقت مش وقت البكا
ماشى على الشبوره
مش باينه دموعه
وهمّا طالعين فى صورة ملايكه
لابسين كوفيات بشراشيب
ومش باين غير شفايف عريضه
بتضحك أو بتترعش فى الهوا
الشفايف اللى عايمه فى البخار
وبتكلم بعضها بين كراسى القطر
وعلى الشبك
إحساس غريب غامض
بيتسرب من الشبابيك المكسوره
والقطر طاير طير
بحبها
لأ
بحاول
بتزنقنى بحكم العادات القديمه
فى ركن ضلمه
وبتقصقص ضوافرى
ممنوع تبات بره
ممنوع تضحك بصوت عالى
ممنوع تخبى دموعك
ها تستخبى ورا مكتبك
ويفاجئك راجل عريض أسمر
ويزقك بكتفه
ويصحصحك صوت المقابل فى محطة قليوب
الوقت مش وقت البكا
براحتهم
إيه اللى ممكن تعمله
وانت طالع على الشبوره
عربيات "تكريم الإنسان" بتقابلك
واقفه وسط الميدان
وانت بتزك برجلك الشمال
وبتفتكر صورتك
وانت بتتكرم وبتسلم على القاده
القاده !
واليفط المتعلقه م الدور الأول للدور
العاشر
ودفتر الإمضا
وعبد الحكم
كل دول ماشيين على الشبوره
وبيرقصو ويايا فى قطر 15و7
ومش باينه دموعهم
مش باين غير دخان السيجاره
وأحاسيس غريبه وغامضه
ممكن يغسلها رذاذ الصبح .
القاهرة فى / 22-12-1997
إسم الشاعرالبلدإسم القسمالمشاهدات
مسعود شومانمصر☆ شعراء العامية في العصر الحديث1174