تاريخ الاضافة
الخميس، 29 مارس 2007 02:31:15 ص بواسطة محمد أسامة
0 1385
باين عليا كبرت
باين عليا كبرت
ــــــــــ
مش الشعر لابيض
اللى باين فى راسى
وفى دقنى
ومش التجاعيد ...
اللى فارت فجأه على وشى
ومش التنيه السوده...
اللى بتوسع تحت عنيا
مش كل دا على بعضه
الصندوق الملوِّن الزاهى
الفاضى
اللى شايله بتاع البيانولا
مش حنية الضهر
ولاالسفر كل يوم ل "شبين"
ولا الخساره فى الطاوله على القهوه
مش كل دا على بعضه
هايحلم بالمسامير اللى مدقوقه فى روحه
وبعلب الورنيش اللى بتترقص جنبها الجزم
ويقوم مفزوع م النوم
مش قلة الفلوس فى جيبه
ولا شقاه رايح جاى للمطبعه
ولا الوش اللى بيلبسه تمن ساعات
ويمكن اكتر
مش كل دا على بعضه
أو يمكن كل دا
خلاه يقول لنفسه
وهوَّ ماشى
باين عليَّا كبرت
إسم الشاعرالبلدإسم القسمالمشاهدات
مسعود شومانمصر☆ شعراء العامية في العصر الحديث1385